ქართული ოცნების დეპუტატის, გია ვოლსკის განცხადებით, ელჩების დანიშვნის საკითხზე საჭიროების შემთხვევაში მიმოწერაც უნდა გასაჯაროვდეს. ამის შესახებ მან პარლამენტში ჟურნალისტებთან ისაუბრა, და მთავრობისთვის პრეზიდენტის პასუხს "ხისტი" უწოდა.

"რასაკვირველია, ეს სკანდალს მოწყურებული მედია სივრცე ამას წარმოადგენს, როგორც რაღაც უბედურებას, მაგრამ ერთი იცოდეთ — დემოკრატიული სამყაროსათვის, დემოკრატიული ქვეყნისთვის, არაფერს არ ნიშნავს ის, რომ კონკრეტულ თემაზე ან კონკრეტულ განმარტებაზე ორ სტრუქტურას, ორ საკონსტიტუციო ინსტიტუტს ჰქონდეს განსხვავებული აზრი.

თუ საჭირო იქნება მიმოწერის გასაჯაროება, რასაკვირველია, ესეც უნდა მოხდეს, ვინაიდან სტრუქტურა არ არსებობს, რომელიც თავისთვის მუშაობს, ან თავისთვის არსებობს, ყველაფერი ეკუთვნის ხალხს, მათ შორის, ინფორმაციაც", — თქვა მან.

გუშინ პრეზიდენტის ადმინისტრაციამ ელჩებისა და დიპლომატიური წარმომადგენლობების დანიშვნის საკითხზე მთავრობის ადმინისტრაციის მიერ გავრცელებულ განცხადებას უპასუხა და აღნიშნა, რომ მთავრობა მას ტყუილში ადანაშაულებს.

კერძოდ, პრეზიდენტის ადმინისტრაციის თქმით, 2021 წლის იანვრიდან 2022 წლის 21 მარტის ჩათვლით მთავრობის წარდგენილ ყველა კანდიდატურაზე შესაბამისი განკარგულებაა გამოცემული, მთავრობა კი აცხადებს, რომ ეს რეალურ სურათს არ ასახავს.