ქართული ოცნების თავმჯდომარის, ირაკლი კობახიძის განცხადებით, როდესაც პრეზიდენტი აკეთებს რაიმე განცხადებას, ეს ვერ იქნება განხილული, როგორც ქვეყნის პოლიტიკური კურსი. მისივე თქმით, რა განცხადებაც არ უნდა გააკეთოს პრეზიდენტმა, ეს მისი პირადი აზრია.

"ეს არის საპარლამენტო რესპუბლიკა და მთავრობა იღებს პოლიტიკურ გადაწყვეტილებებს, მთავრობა განსაზღვრავს პოლიტიკას პარლამენტთან ერთად, ანუ პარლამენტი და მთავრობა განსაზღვრავენ და ახორციელებენ პოლიტიკას. აქ ერთი რამის დაფიქსირება არის მნიშვნელოვანი, როდესაც პრეზიდენტი აკეთებს რაიმე განცხადებას, ეს ვერავითარ შემთხვევაში ვერ იქნება განხილული, როგორც ქვეყნის პოლიტიკური კურსი. ქვეყნის პოლიტიკურ კურსს განსაზღვრავენ პარლამენტი და მთავრობა და ეს კურსი გამოხატულია მხოლოდ და მხოლოდ პარლამენტისა და მთავრობის განცხადებებში, შესაბამისად რა განცხადებაც არ უნდა გააკეთოს პრეზიდენტმა, ეს მისი პირადი აზრია", — განაცხადა კობახიძემ POS TV-ს ეთერში.

მისივე თქმით, როდესაც ზურაბიშვილმა უკრაინის ელჩის მოვალეობის შემსრულებელი შეიყვანა სხდომათა დარბაზში, არად ჩააგდო პარლამენტის თავმჯდომარის ექსკლუზიური უფლება.

"შემაშფოთებელი არის ის, რომ მეტნაკლებად კონსტიტუციის ჩარჩოებში მოქმედებდა სისტემა გასული სამ წელიწად-ნახევრის განმავლობაში. როდესაც გართულდა ვითარება, რეგიონულ კონტექსტს ვგულისხმობ, მაშინ გაჩნდა რატომღაც, ეს უცნაურიცაა და სამწუხაროც, კონსტიტუციის მიღმა მოქმედების ტენდენცია. ასეთი არაერთი შემთხვევა იყო, ასეთი შემთხვევა იყო ელჩებთან დაკავშირებით, ასეთი შემთხვევა იყო ვიზიტებთან დაკავშირებით და ასეთი შემთხვევა იყო საქართველოს პარლამენტში, როდესაც პრეზიდენტმა არად ჩააგდო პარლამენტის თავმჯდომარის ექსკლუზიური პრეროგატივა, მას დაუმალა კონკრეტული ქმედება, კერძოდ ის, რომ შემოჰყავდა უკრაინის ელჩის მოვალეობის შემსრულებელი სხდომათა დარბაზში.

კონსტიტუცია ანიჭებს პარლამენტის თავმჯდომარეს ექსკლუზიურ უფლებას, რომ განაგოს ყველაფერი პარლამენტის სხდომათა დარბაზში. არათუ შეთანხმება, ინფორმირებაც კი არ მომხდარა, მინიშნების დონეზეც კი არ იყო არაფერი ნათქვამი ამასთან დაკავშირებით", — ამბობს კობახიძე.

15 მარტს მმართველმა გუნდმა განაცხადა, რომ აპირებს მიმართოს საკონსტიტუციო სასამართლოს და პრეზიდენტის მხრიდან "კონსტიტუციის დარღვევის დადასტურება" მოითხოვოს. ამას წინ უძღოდა პარლამენტში პრეზიდენტის კრიტიკულ გამოსვლა, რასაც მმართველმა გუნდმა კრიტიკული ფეისბუქპოსტით უპასუხა.

პარტიის პოლიტიკური საბჭოს განცხადებაში ვკითხულობთ, რომ გასული თვეების განმავლობაში შედგა არაერთი შეხვედრა მთავრობის წარმომადგენლებსა და ზურაბიშვილს შორის, სადაც მას არაერთგზის განემარტა კონსტიტუციის შინაარსი, თუმცა, მათი თქმით, უშედეგოდ.