უკრაინელი პოლიციის გენერალი ვიაჩესლავ აბროსკინი რუსებს მარიუპოლიდან ბავშვების გამოყვანის ნაცვლად ტყვედ ჩაბარებას სთავაზობს. მან Facebook პოსტი გამოაქვეყნა და ამბობს, რომ მზადაა შევიდეს მარიუპოლში და იქიდან ბავშვების გამოყვანა დააორგანიზოს.

ის ამბობს, რომ ამისთვის სამი დღე დასჭირდება, რის შემდეგაც საგუშაგოზე დარჩება და რუსებს ტყვედ ჩაბარდება.

"მე ვარ პოლიციის გენერალი, რომელიც 2014-დან 2018 წლამდე უშუალოდ მოქმედებდა თქვენს წინააღმდეგ. მე შეყვანილი ვარ თქვენი სანქციების სიაში. მე თქვენს ძებნილთა სიაში ვარ. ჩემი ლიკვიდაციის მიზნით ჩემზე თავდასხმა მოაწყვეთ. ჩემი მონაწილეობით ათობით თქვენიანი დაიღუპა, ხოლო ათასობით დააკავეს. მე ვარ ზუსტად ის გენერალი, რომელიც ალბათ ყველაზე ახლოს იცნობს "აზოვის" ცნობილ პოლკს. ეს ჩემი პირადი ინიციატივაა", — წერს პოლიციის გენერალი.

ის წერს, რომ მისი სიცოცხლე მხოლოდ მას ეკუთვნის და ჯერ კიდევ მარიუპოლში მყოფი ბავშვების სიცოცხლის სანაცვლოდ სთავაზობს.

"დღეს მთლიანად დანგრეულ ქალაქში ძალიან ბევრი ბავშვია ჩარჩენილი, რომლებიც ახლა თუ არ გადაარჩინე, უახლოეს დღეებში დაიღუპებიან, საუბარია უკვე საათებზე. მივმართავ რუს ოკუპანტებს — მომეცით საშუალება მარიუპოლიდან ბავშვები გამოვიყვანო. ჯერ კიდევ ცოცხალი ბავშვების ნაცვლად ჩემს თავს გთავაზობთ", — წერს ის.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში