საზოგადოებრივი მაუწყებლის ჟურნალისტმა იმედა დარსალიამ დაასახელა იმ რესპონდენტების სახელი და გვარები, რომელთა ჩაწერაც, მისი თქმით, პირველმა არხმა აუკრძალა. დარსალიას თქმით, ეს ის ე.წ. შავი სიაა, რომლის შესახებაც მან მედიაში რამდენიმე კვირის წინ ისაუბრა.

ჟურნალისტის თქმით, ასე გამოიყურება "შავი სიის" ნაწილი:

  • რონდელის ფონდის ექსპერტების უმრავლესობა;
  • ზურა ბატიაშვილი;
  • ბუკა პეტრიაშილი;
  • თინა ხიდაშელი;
  • ლაშა ბაქრაძე;
  • ეკა აკობია;
  • ბათუ ქუთელია.

მისივე განცხადებით, ეს სია ეხებოდა კონკრეტულ თემებსაც, რომელზეც საერთაშორისო საკითხებზე მომუშავე ჟურნალისტმა რამდენჯერმე შენიშვნა მიიღო.

"ამ ჟურნალისტის შემთხვევაში, რომელიც საერთაშორისო თემებზე მუშაობს, დაიბლოკა საბჭოთა კავშირის სამხედრო დანაშაულზე სიუჟეტი, რასაც კონფლიქტი მოჰყვა გუნდში. დაიბლოკა ბელარუსის აქციები ანალიტიკურ ჭრილში, ასევე, ჟურნალსიტი გააფრთხილეს რომ ეკრძალება რუსეთზე ცუდის დაწერა და პარალელი გაავლეს ამერიკასთან, რომ როგორც ამერიკაზე არ უნდა დავწეროთ ცუდი, ასევე, არ უნდა დავწეროთ რუსეთზე, რადგან ჩვენი მაყურებლის გარკვეული ნაწილი პრორუსია, ვციტირებ", — განაცხადა მან.

ბრიფინგს, ასევე, ესწრებოდნენ საერთაშორისო გამჭვირვალობა — საქართველოს იურისტები, რომლებიც დარსალიასა და საზოგადოებრივი მაუწყებლის კიდევ ორი ჟურნალისტის ინტერესებს იცავენ. ისინი საქმის ფარგლებში სახალხო დამცველს მიმართავენ.

"ვიწყებთ სახალხო დამცველთან მიმართვით, მივმართავთ განცხადებით, სადაც სამივე მათგანის შრომითსამართლებრივი უფლებებში ჩარევის შესახებ ვისაუბრებთ, წარვადგენთ მტკიცებულებებს და შესაბამისად, ვფიქრობთ ეს საკმარისია იმისთვის, რომ დადასტურდეს დისკრიმინაციული მიდგომა და ხელშეშლა მათი პროფესიული საქმიანობის განხორცილებაში, დავიცავთ მათ უფლებებს მიმდინარე რეორგანიზაციის პირობებშიც", — თქვა TI-ის იურისტმა.

საზოგადოებრივი მაუწყებლის გადაცემა ახალი კვირის წამყვანმა, იმედა დარსალიამ 17 თებერვალს განაცხადა, რომ გადაცემა გააჩერეს და ეთერიდან მოხსნეს, რაზეც ტელეკომპანიაში ამბობენ, რომ დაგეგმილია რეორგანიზაცია. როგორც On.ge-ის დარსალია მაშინ განუცხადა, ინფორმაცია 28 დეკემბერს მიაწოდეს. მოგვიანებით მან ისაუბრა, რომ საზოგადოებრივ მაუწყებელში იყო შავი სიები, ანუ იმ ადამიანების ჩამონათვალი, თუ ვინ უნდა ჩაწეროს ჟურნალისტმა და ვინ არა.