ჯანდაცვის სამინისტროს ცნობით, COVID-19-ის სამკურნალო პრეპარატის, პაქსლოვიდის პირველი პარტია საქართველოში უკვე ჩამოვიდა. უწყების განცხადებით, საქართველო პირველი ქვეყანაა რეგიონში, სადაც კორონავირუსის სამკურნალო მედიკამენტი ხელმისაწვდომი ხდება და ის პაციენტებს უფასოდ გადაეცემათ.

"პაქსლოვიდი COVID-19-ის წინააღმდეგ შექმნილი პირველი ყველაზე ეფექტური წამალია. მედიკამენტი ვირუსის გამრავლების უნარის შეზღუდვას ახდენს. პაქსლოვიდის ინფიცირების დადასტურებისთანავე გამოყენების შემთხვევაში, დაავადება ვეღარ პროგრესირებს, რაც ამცირებს ჰოსპიტალიზაციის რისკს. მედიკამენტი 90%-მდე იცავს დაავადების გართულებისგან", — აღნიშნულია სამინისტროს მიერ გავრცელებულ განცხადებაში.

უწყების ინფორმაციით, პაქსლოვიდით მკურნალობა ვირუსის დადასტურების ადრეულ ეტაპზე უნდა დაიწყოს — მკურნალობის კურსი 5 დღეს მოიცავს. მათი განცხადებით, ჯანდაცვის სამინისტროს მიერ, კლინიკური ჯგუფის ექსპერტებთან ერთად, უკვე შემუშავებულია შესაბამისი პროტოკოლი, რომლის მიხედვითაც ის პრიორიტეტული პაციენტები განისაზღვრა, ვისთვისაც მედიკამენტებია განკუთვნილი.

"პრეპარატის გამოყენება მსუბუქი და საშუალო სიმძიმის იმ პაციენტებში მოხდება, ვისაც პროგნოზულად დამძიმების მაღალი რისკი აქვთ, როგორიცაა ქრონიკული დაავადების მქონე პირები, ხანდაზმულები და ა.შ. პრეპარატის დანიშვნის შესახებ გადაწყვეტილებას, პაციენტის ოჯახის ექიმი მიიღებს და მისი მიწოდება ბინაზე მოხდება", — ნათქვამია განცხადებაში.

ჯანდაცვის სამინისტროს ინფორმაციით, COVID-19-ის სამკურნალო მედიკამენტი კომპანია Pfizer-მა შექმნა და ის აღიარებულია, როგორც აშშ-ს სურსათისა და წამლის სააგენტოს (FDA) ასევე ევროპის წამლის სააგენტოს (EMA) მიერ.