ქართული ოცნების აღმასრულებელი მდივნის, მამუკა მდინარაძის განცხადებით, საგარეო პოლიტიკასთან დაკავშირებით, ნაციონალური მოძრაობის არცერთ ინიციატივას არ განიხილავენ. არგუმენტად მდინარაძეს მოჰყავს ის, რომ "ომის პარტია" საქართველოს წინააღმდეგ საინფორმაციო და ჰიბრიდულ ომს აწარმოებს.

"ომის პარტიის მოღალატეობრივი და ანტისახელმწიფოებრივი პოლიტიკიდან გამომდინარე, მივიღეთ გადაწყვეტილება, რომ არ განვიხილოთ ომის პარტიის, ასევე, მისი დანაყოფების არცერთი ინიციატივა. წარმოუდგენელია შეხვიდე, იმ ხალხის მიერ ინიცირებული შინაარსის განხილვაში, რომლებიც ჰიბრიდულ, საინფორმაციო ომს აწარმოებენ საკუთარი ქვეყნის წინააღმდეგ. მათი მიზანია, საქართველო ჩაითრიონ ომში, გაზარდონ სამომავლო რისკები, ან როგორც მინიმუმ, უკიდურესი, გამოუსწორებელი ზიანი მიაყენონ ქვეყნის იმიჯს", — თქვა მან.

მისივე თქმით, გადაწყვეტილება არსებულ სიტუაციაში "სასიცოცხლოდ მნიშვნელოვანია", რათა ქვეყანაში მშვიდობა იყოს უზრუნველყოფილი.

"ქვეყნის ეროვნული ინტერესებიდან გამომდინარე, ამისთვის ჩვენ ყველაფერს გავაკეთებთ", — დასძინა მან.

17 მარტს პარტია ლელო ინიციატივით გამოვიდა, რომ უახლოეს დღეებში საქართველოს პარლამენტში სიტყვით გამოსვლისთვის მოიწვიონ უკრაინის პრეზიდენტი ვოლოდიმირ ზელენსკი. ენმ-ის ერთ-ერთი ლიდერის, ხატია დეკანოიძის განცხადებით კი უკრაინის პრეზიდენტის ადმინისტრაცია მზადაა, ვოლოდიმირ ზელენსკი საქართველოს პარლამენტში ჩაერთოს და ქართულ საზოგადოებას მიმართოს.

პარლამენტის თავმჯდომარემ, შალვა პაპუაშვილმა ოპოზიციის სურვილი, ზელენსკიმ პარლამენტს მიმართოს, ისტერიად შეაფასა, თუმცა ოპოზიციამ უკვე ოფიციალურად გააფორმა ეს ინიციატივა და მას შესაბამისი წერილით მიმართა. ამავე დღეს მდინარაძემ განაცხადა, რომ ნაციონალური მოძრაობისა და "მისი დანაყოფების" ინიციატივას მმართველ პარტიაში სერიოზულად არ უყურებენ. მდინარაძის აზრით, ოპოზიციის ინიციატივები ფილტრის ქვეშ უნდა გადიოდეს.