ნაციონალური მოძრაობის ერთ-ერთი ლიდერის, ხატია დეკანოიძის განცხადებით, უკრაინის პრეზიდენტის ადმინისტრაცია მზადაა, ვოლოდიმირ ზელენსკი საქართველოს პარლამენტში ჩაერთოს და ქართულ საზოგადოებას მიმართოს.

"მე მქონდა მათთან საუბარი დღეს დილას და რამდენიმე საათის წინ. პრეზიდენტი ზელენსკის ადმინისტრაცია მზადაა, პრეზიდენტი ზელენსკი ჩაერთოს საქართველოს პარლამენტში და მიმართოს საქართველოს საზოგადოებას საქართველოს პარლამენტიდან. ბატონო შალვა, მე შემიძლია თქვენთან გავმართო კონსულტაციები ამასთან დაკავშირებით და ჩვენ, როგორც საქართველოს პარლამენტმა, თითოეულმა აქ მჯდომმა ჩემმა კოლეგამ, ჩვენ ყველამ და თქვენც, როგორც ხელისუფლების წარმომადგენელმა, აქ ყველამ ერთად უნდა მოვუსმინოთ პრეზიდენტს", — განაცხადა დეკანოიძემ პარლამენტში.

მისივე თქმით, იმედი აქვს, რომ ეს სოლიდარობა მხოლოდ უკრაინის დროშის გაკვრად არ დარჩება, რაც ძალიან მნიშვნელოვანია.

"ოპოზიციამ დააყენა ეს ინიციატივა, მე მქონდა კონსულტაციები უკვე და მზადაა პრეზიდენტის ადმინისტრაცია, რომ ნამდვილად იმ ძალიან მძიმე პერიოდში და ომში, რომელშიც არის ახლა უკრაინა, პრეზიდენტი ზელენსკი საქართველოს პარლამენტიდან გამოეხმაუროს ქართულ საზოგადოებას. მე დიდი იმედი მაქვს, ძალიან დიდი იმედი მაქვს, რადგან პრეზიდენტი ზელენსკი გამოდის კონგრესში, გამოდის ბუნდესტაგში, გამოდის სენატში, მიმართავს ყველა ქვეყანას, ყველა ქვეყნის პარლამენტს და წარმომადგენლობით ორგანოებს. მე ძალიან დიდი იმედი მაქვს, რომ ეს სოლიდარობა არ დარჩება მხოლოდ უკრაინული დროშის გაკვრად, რაც ძალიან მნიშვნელოვანია", — ამბობს ის.