საქართველოს პარლამენტის თავმჯდომარე შალვა პაპუაშვილი უკრაინის პრეზიდენტის ვოლოდიმირ ზელენსკის პარლამენტში მოსმენის სურვილს ოპოზიციის მხრიდან მორიგ ისტერიად აფასებს და ამბობს, რომ ლელოს და ნაციონალური მოძრაობის არც ერთი ინიციატივას არ გაიზიარებენ.

"საერთოდ რაც შეეხება ნაციონალურ მოძრაობას და ლელოს ინიციატივებს უკრაინასთან დაკავშირებით ჩვენ ვთქვით, რომ არცერთ ამ ინიციატივას არ გავიზიარებთ, იმიტომ, რომ გასაგებია მათი ხაზი, მათი ხაზი არის ისტერია. აქედან გამომდინარე ჩვენ მას საერთოდ არც კი განვიხილავთ. მე პირადად არც კი განვიხილავ არცერთ მათ ინიციატივას", — უთხრა TV პირველის ჟურნალისტს.

კითხვაზე, ზელენსკის მიმართვა იქნებოდა თუ არა მომგებიანი საქართველოსთვის და აჩვენებდა თუ არა მათ მხარდაჭერას, პაპუაშვილმა უპასუხა, რომ ისინი ფიქრობენ უკრაინელ ხალხზე და არა პიარზე.

"ჩვენ პიარზე კი არ ვფიქრობთ, ჩვენ ვფიქრობთ უკრაინელ ხალხზე. იმ ომზე, რომელიც მიმდინარეობს უკრაინაში და ჩვენ სწორედ ამაზე ვსაუბრობთ. აქ მთავარი ის კი არ არის რომ მოხდეს თეატრალიზება ამ საკითხის", — ამბობს პაპუაშვილი.

მან ოპოზიციას მიმართა და თქვა, რომ თუ სურთ რეალური დახმარება, პარლამენტში სადაც არის ფონდი გახსნილი "ერთი თეთრი მაინც ოპოზიციიდან, შეიტანოს იმისთვის, რომ უკრაინელ ხალხს დავეხმაროთ".

გუშინ, 17 მარტს პარტია ლელო ინიციატივით გამოვიდა, უახლოეს დღეებში საქართველოს პარლამენტში სიტყვით გამოსვლისთვის მოიწვიონ უკრაინის პრეზიდენტი ვოლოდიმირ ზელენსკი. დეპუტატ სალომე სამადაშვილის თქმით, ეს იქნებოდა ყველაზე სწორი ნაბიჯი ჩვენი მხრიდან პოლიტიკური მხარდაჭერის დემონსტრაციისთვის და იმის საჩვენებლად, თუ სად დგას საქართველო.

დღეს მათ უკვე ოფიციალურად გააფორმეს ეს ინიციატივა და შესაბამისი წერილით საქართველოს პარლამენტის თავმჯდომარეს მიმართეს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში