უკრაინის პრეზიდენტის ადმინისტრაციის მრჩევლის, მიხაიოლო პოდოლიაკის განცხადებით, უახლოეს კვირებში, შესაძლოა, ვოლოდიმირ ზელენსკი და ვლადიმერ პუტინის ერთმანეთს შეხვდნენ. მისი თქმით, შეხვედრის მოსამზადებელი სამუშაოები დაიწყება მას შემდეგ, როცა სამშვიდობო შეთანხმება დაიდება, ამას კი წინ უძღვის შეთანხმების საკამათო საკითხების გადაწყვეტა, რასაც კვირანახევრამდე დასჭირდება.

ევროპეისკაია პრავდას ინფორმაციით, ამის შესახებ პოდოლიაკმა WP Wiadomości-სთან ინტერვიუში განაცხადა. პოდოლიაკმა თქვა, რომ უკრაინა არა მხოლოდ ხელს აწერს ხელშეკრულებას, არამედ სურს შეიმუშაოს კონკრეტული მექანიზმი, რომელიც მომავალში მისი უსაფრთხოების გარანტი იქნება.

"ჯერჯერობით, როგორც რუსეთის, ასევე უკრაინის დელეგაციები დგანან თავიანთ პოზიციებზე. საკამათო პუნქტების შეთანხმება შეიძლება გაგრძელდეს რამდენიმე დღიდან კვირანახევრამდე. ამ დროის განმავლობაში ჩვენ უნდა მივუახლოვდეთ სამშვიდობო შეთანხმების დადებას", — თქვა მან.

პოდოლიაკმა აღნიშნა, რომ როგორც კი შეთანხმებაზე მუშაობა დასრულდება, უკრაინისა და რუსეთის პრეზიდენტების შეხვედრის ორგანიზება დაიწყება.

"ეს მოხდება უახლოეს კვირებში. ზოგადად, ადგილს ჩვენთვის მნიშვნელობა არ აქვს. ის შეიძლება იყოს ნებისმიერ ადგილას, რუსეთის გარდა", — თქვა მან.

პოდოლიაკის თქმით, სამშვიდობო შეთანხმება პირველ რიგში ითვალისწინებს უკრაინის ინტერესებს, რომელმაც დიდი ზარალი განიცადა რუსეთის შემოჭრის გამო.

რაც შეეხება სამშვიდობო შეთანხმების დადების შემდეგ რუსეთის ფედერაციასთან სამომავლო ურთიერთობებს, პოდოლიაკმა აღნიშნა, რომ შეუძლებელი იქნება წარსულში დაბრუნება და "ძმურ ხალხებზე" საუბარი.

"ხიდები აფეთქებულია. ჩვენ შევქმნით ძლიერ საზღვრებს და ისევე ცივად მოვექცევით რუსეთს, როგორც ამას იმსახურებს ქვეყანა, რომელიც ჩვენს სახლში შემოიჭრა ჩვენს მოსაკლავად", — თქვა მან.

ვოლოდიმირ ზელენსკიმ არაერთხელ მოუწოდა პუტინს შეხვედრისკენ, თუმცა პუტინი უარზე იყო. რამდენიმე დღის წინ კი რუსეთის საგარეო საქმეთა მინისტრმა განაცხადა, რომ პუტინი ყოველთვის მზად არის შეხვედრისთვის, თუ ამის საჭიროებას ხედავს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში