საერთაშორისო სასამართლომ მოუწოდა რუსეთს, დაუყოვნებლივ შეწყვიტოს საომარი მოქმედებები უკრაინაში. დროებითი ღონისძიება სასამართლომ უკრაინის მიმართვის შემდეგ მიიღო.

სასამართლომ 13 ხმით 2-ის წინააღმდეგ გადაწყვიტა, რომ რუსეთმა უკრაინის ტერიტორიაზე 24 თებერვალს დაწყებული სამხედრო აგრესია დაუყონებლივ უნდა შეაჩეროს. ასევე, 13 ხმით 2 წინააღმდეგ სასამართლო რუსეთს ავალდებულებს უზრუნველყოს, ნებისმიერმა სამხედრო ან არარეგულარულმა შეიარაღებულმა დანაყოფმა, რომელსაც ის ხელმძღვანელობს ან მის მიერაა მხარდაჭერილი, ისევე, როგორც ნებისმიერმა ორგანიზაციმ ან პირმა, რომელიც მას ექვემდებარება არ გადადგას ნაბიჯები პირველ პუნტქში მითითებული სამხედრო ოპერაციის გასაგრძელებლად.

გარდა ამისა, სასამართლოს წევრებმა ერთხმად დააკისრეს უკრაინასა და რუსეთს, თავი შეიკავონ ნებისმიერი ქმედებისგან, რომელმაც შესაძლოა, სასამართლოს წინაშე დავა გაახანგრძლივოს, ან მისი გადაჭრა გაურთულოს.

"რუსეთის ფედერაციამ საქმეზე საბოლოო გადაწყვეტილების მოლოდინში, დაუყოვნებლივ უნდა შეაჩეროს საომარი მოქმედებები, რომელიც დაიწყო 2022 წლის 24 თებერვალს უკრაინის ტერიტორიაზე", — ციტირებს მოსამართლეს Reuters.

როგორც უკრაინული მედია წერს, გადაწყვეტილების გამოცხადებისას მოსამართლემ აღნიშნა, რომ სასამართლოს აქვს იურისდიქცია, გამოიძიოს ხდება თუ არა უკრაინაში გენოციდი, მას შემდეგ რაც უკრაინამ რუსეთის წინააღმდეგ სარჩელი შეიტანა. მოსამართლემ ასევე განმარტა, რომ სასამართლოს არ აქვს არანაირი მტკიცებულება იმისა, რომ უკრაინა თავის ტერიტორიაზე გენოციდს ახორციელებდა, როგორც ამას რუსეთი ამტკიცებს.

ამასთან დაკავშირებით უკრაინის პრეზიდენტმა, ვოლოდიმირ ზელენსკიმ დაწერა, რომ უკრაინამ საერთაშორისო სასამართლოში რუსეთის წინააღმდეგ საქმეში სრული გამარჯვება მოიპოვა.

"უკრაინამ საერთაშორისო სასამართლოში რუსეთის წინააღმდეგ საქმეში სრული გამარჯვება მოიპოვა. ICJ-მ ბრძანა დაუყოვნებლივ შეაჩერონ შემოჭრა. საერთაშორისო სამართლის მიხედვით ბრძანება სავალდებულოა. რუსეთმა ის დაუყოვნებლივ უნდა შეასრულოს. ბრძანების უგულებელყოფა რუსეთს უფრო მეტად მოაქცევს იზოლირებაში", — წერს ის.

უკრაინამ რუსეთის წინააღმდეგ გაეროს საერთაშორისო სასამართლოში (ICJ) სარჩელი 28 თებერვალს შეიტანა. პრეზიდენტმა, ვოლოდიმირ ზელენსკიმ განცხადა, რომ რუსეთი აგრესიის გასამართლებლად გენოციდის ცნების მანიპულაციური გამოყენებისთვის პასუხი უნდა აგოს. მან ICJ-ს მოუწოდა გადაუდებელი გადაწყვეტილება მიიღონ.