ბრიტანეთის პრემიერმინისტრის, ბორის ჯონსონის განცხადებით, დასავლეთმა "საშინელი შეცდომა" დაუშვა, როცა 2014 წელს ვლადიმერ პუტინს ყირიმის ანექსია შეარჩინა და რუსეთის გაზზე დამოკიდებულება გააგრძელა. მის კომენტარს გამოცემა The Telegraph ავრცელებს.

"როცა რუსეთი უკრაინაში პირველად შეიჭრა, 2014 წელს, დასავლეთმა საშინელი შეცდომა დაუშვა. რუსეთის ლიდერმა ჩაიდინა ძალადობრივი აგრესიის აქტი და სუვერენული სახელმწიფოს დიდი ნაწილი მიიტაცა — და ჩვენ უფლება მივეცით ეს შერჩენოდა", — განაცხადა მან.

ჯონსონის თქმით, გადაწყვიტეს, რომ როგორღაც ნორმალურ მდგომარეობამდე დაბრუნება შეეძლოთ და ეკონომიკური ურთიერთობები უბრალოდ კი არ განახლდა, გაძლიერდა — დასავლეთი უფრო მეტად ხდებოდა რუსულ გაზზე დამოკიდებული, ვიდრე ადრე.

"ამიტომ, როცა მან საბოლოოდ დაიწყო მისი სასტიკი ომი უკრაინაში, იცოდა, რომ მსოფლიოს მისი დასჯა გაუჭირდებოდა. იცოდა, რომ მან შექმნა დამოკიდებულება. ამიტომაც არის, რომ შეუძლია სამშობიაროების დაბომბვა, ამიტომაც არის საკმარისად გათამამებული, რომ განურჩეველი თავდასხმები განახორციელოს გაქცეულ ოჯახებზე", — აღნიშნა ჯონსონმა.

მედიის ცნობით, ჯონსონმა ვლადიმერ პუტინი რუსული ენერგორესურსებით "შანტაჟში" დაადანაშაულა და აღნიშნა, რომ ასე ვეღარ გააგრძელებენ.

"სანამ დასავლეთი ეკონომიკურად დამოკიდებულია პუტინზე, ის ყველაფერს გააკეთებს, რომ ეს დამოკიდებულება გამოიყენოს. სწორედ ამიტომ, ეს დამოკიდებულება ახლავე უნდა შეწყდეს და შეწყდება", — თქვა მან.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში