რა არის MASHOVERSE? - რა და, მაშო მარგიშვილის მიერ შექმნილი ვირტუალური სივრცე, რომელიც ამ ჯადოსნური სამყაროს სხვადასხვა პერსონაჟების NFT პროექტებსა და სამომავლოდ, მეტავერსში არსებულ თამაშს აერთიანებს.

მაშოვერსის არაერთ პროექტს მისი სოციალური შინაარსობრივი დატვირთვა ხდის გამორჩეულს.

პატარა და მშრომელი გუნდი MASHOVERSE-ის ამჟამინდელ შემოქმედებით სამეგობროსთან ერთად, ყოველთვის ცდილობს, გვერდით დაუდგეს გარემოს, ადამიანებს, თემსა თუ მიზნებს, საჭიროების შესაბამისად.

ამ ეტაპზე მისი მშვენიერება მაშოვერსი NFT სივრცეში წარმოდგენილია ქვაჭამიების პერსონაჟებითა და ვიზუალური ნამუშევრებით. ყველაზე მსხვილი, 6000-ანი, პროგრამის დახმარებით შექმნილი ქვაჭამიების კოლექციის გაშვებას აპრილის ბოლოს იგეგმებოდა, თუმცა უკრაინაში ბოლო დროს განვითარებულმა მოვლენებმა, მაშოვერსის გუნდს დაანახა, რომ - ჯერ ერთი "დიდება უკრაინას", და მეორეც, - აუცილებელია საქველმოქმედო აქციის ორგანიზება ჩვენი მამაცი და მებრძოლი მეგობრებისთვის. სწორედ ასე შეიქმნა MASHOVERSE 4 UKRAINE - მაშოვერსი უკრაინისთვის.

ფოტო: MASHOVERSE

საქველმოქმედო პროექტის ფარგლებში, მაშო სხვა ქართველ თუ უცხოელ ხელოვანებთან ერთად, 5 მარტიდან - 5 აპრილის ჩათვლით, შექმნის NFT სერიას, რომელთა დადებითი გზავნილები გაზრდის ცოდნას, უკრაინაში არსებულ ვითარებასთან დაკავშირებით. გამოგზავნილი ნამუშევრები ოფიციალური წესების მიხედვით განიხილება და RMRK-ის გუნდის დახმარებით Singular-ზე განთავსდება. რა თქმა უნდა, შემოწირულობები გადაირიცხება უკრაინაში.

ნამუშევრები შეიძლება იყოს როგორც კონკრეტულ, ისე თავისუფალ თემაზე.

ახალი NFT-ების ატვირთვა პლატფორმაზე ყოველდღიურ რეჟიმში მოხდება. აუცილებლად ნახავთ ცნობილი ქართველი არტისტების ნამუშევრებსაც.

კამპანია აქტიურ მარკეტინგულ ჩართულობას გეგმავს, რაშიც თავად Singular-ის დამფუძნებლებიც არიან ჩართულები. მიზანი, რაც შეიძლება მეტი რესურსის შეგროვებაა. შემოსული თანხა ავტომატურად გადაირიცხება საქველმოქმედო ორგანიზაცია CARE-ის უკრაინისთვის განკუთნილ ელექტრონულ საფულეში.

MASHOVERSE-ის ქვაჭამიებისა და სხვა ნამუშევრების ნახვა ამ ლინკის მეშვეობით არის შესაძლებელი.

ფოტო: MASHOVERSE

პროექტის ორგანიზატორები ამბობენ: "ჩვენ ვართ ქვაჭამიები და შემოქმედებითი ადამიანები მაშოვერსიდან, რომლებიც, სხვა ხელოვანებთან ერთად, უკრაინის თითოეული ქვისა თუ კენჭის გადასარჩენად ვიბრძოლებთ!".

მეტი ინფორმაციისთვის შეგიძლიათ MASHOVERSE-ის ვებგვერდს ეწვიოთ.