გორის საკრებულოს თავმჯდომარის, დავით რაზმაძის თქმით, მას უკრაინის ხელისუფლებაზე კარგი წარმოდგენა აღარ აქვს. რაზმაძე ამბობს, რომ საქართველო უკრაინას უამრავ დახმარებას უწევს.

"მე მაგალითად, ხელისუფლებაზე უკრაინისა უკვე კარგი წარმოდგენა აღარ მაქვს იმიტომ, რომ როცა საქართველო უამრავ[...] დახმარებას უწევს და ამ დროს რაღაც თემებით არიან დაინტერესებული. მიხედე იქ უკრაინაში. 45-მილიონიან სახელმწიფოს ის ძალა არ ჰქონდა, რომ ამ დაჟანგებულ რუსულ არმიას ელემენტარული წინააღმდეგობა გაეწია", — თქვა მან.

საკრებულოს თავმჯდომარის განცხადებით, სტალინის მუზეუმი ქვეყნისა და მუნიციპალიტეტისთვის სერიოზული შემოსავალია.

"სტალინის აპოლოგეტი არ არის ჩვენი სახელმწიფო, მაგრამ არსებული მუზეუმი ძალიან სერიოზული შემოსავალია ჩვენი ქვეყნისთვის და ჩვენი მუნიციპალიტეტისთვის. ეს მუზეუმი თან ექვემდებარება კულტურის სამინისტროს. ვფიქრობ, რომ ეს განცხადება იყო ძალიან არასერიოზული", — ამბობს რაზმაძე.

28 თებერვალს პრემიერმინისტრმა ირაკლი ღარიბაშვილმა განაცხადა, რომ რუსეთის მიმართ დასავლეთის დაწესებული სანქციები ეფექტური საშუალება არაა. მისი თქმით, რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება".

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.