უკვე რამდენიმე დღეა, Google Maps-ის მომხმარებლები რუსეთის პოპულარულ ადგილებსა და დიდ ქალაქებს უკრაინის დაბომბილი საცხოვრებლების, დაშავებული მშვიდობიანი მოსახლეობისა და დატყვევებული რუსი ჯარისკაცების ფოტოებს ამატებენ.

პუტინის გადაწყვეტილებით, რუსეთში უკრაინის ომის შესახებ ახალი ამბების გაშუქება შეიზღუდა, ხოლო Facebook-სა და Twitter-ზე რუს მოქალაქეებს მხოლოდ რამდენიმე რეგიონიდან შეუძლიათ ახალი ამბების წაკითხვა. ასე რომ, Google Maps ინფორმაციის გავრცელების ერთ-ერთ წყაროდ იქცა და მისმა მომხმარებლებმა გადაწყვიტეს, რუსეთის ღირსშესანიშნაობები უკრაინის ომის ამსახველი კადრებით ჩაენაცვლებინათ.

Google Maps-ის მომხმარებლები შეფასების განყოფილებაში რუსებს უხეშ კომენტარებსაც უწერენ. მაგალითად, მოსკოვის სახელმწიფო უნივერსიტეტის ზოოლოგიური მუზეუმის შეფასებებში ასეთ კომენტარს ვკითხულობთ: "თქვენ გარდაცვლილი ცხოველები გყავთ", რასაც თან ახლავს დატყვევებული რუსი ჯარისკაცების ფოტოები.

მომხმარებლები თითქმის ყველა ქალაქს, მონუმენტსა და მნიშვნელოვან ადგილს დატყვევებული რუსი ჯარისკაცების ფოტოებს ამატებენ. ამ ლოკაციებზე ერთ-ერთი ხშირად გამოქვეყნებული ფოტო დედისა და რუსი ჯარისკაცის დიალოგის "სქრინია". ჯარისკაცი დედას ეუბნება, რომ უკრაინელები რუსებს ფაშისტებს ეძახიან და ასევე აღიარებს, რომ თავს მშვიდობიან მოსახლეობასაც ესხმის.

"Google Maps-ში ბოლო პერიოდში დამატებული ფოტოების გამო ჩვენ დამატებითი დაცვის სისტემის გამოყენება დავიწყეთ, რათა შინაარს აცდენილი მასალის განთავსება გავაკონტროლოთ. ამ ეტაპზე რეგიონში ბოლოს დამატებული ფოტოები და მიმოხილვები დროებით იბლოკება, რათა გადავამოწმოთ", — ამბობს Google-ის წარმომადგენელი.

ბოლო პერიოდში გავრცელებული ინფორმაციით, რუსი ჯარისკაცების ბევრმა ოჯახმა არ იცოდა, რომ მათ ვაჟებს უკრაინაში გზავნიდნენ. "გუშინ ჩემი ძმის ვიდეო გამომიგზავნეს და გაოგნებული დავრჩი. წარმოდენა არ მქონდა, რომ ის ომში იბრძოდა. ვფიქრობ, რომ არც მან იცოდა, თუ უკრაინაში გაგზავნას უპირებდნენ", — ამბობს Guardian-თან ინტერვიუში ერთ-ერთი რუსი ჯარისკაცის და.

გასულ კვირას Google Maps-მა უკრაინის ტერიტორიაზე გააუქმა ფუნქცია, რომელიც ქვეყნაში გადაადგილებების შესახებ ინფორმაციას პირდაპირ ეთერში გადასცემდა. Google Maps-მა ეს გადაწყვეტილება რეგიონის ხელისუფლებასთან მოლაპარაკებების შემდეგ მიიღო.