რამდენიმე მსხვილი კინოკომპანია რუსეთში დაგეგმილ პრემიერებს აჩერებს.

Warner Bros.-ის განცხადებით, ბეტმენის რუსეთში დაგეგმილი პრემიერა გაუქმდა. DC-ის ცნობილი კომიქსის ადაპტაცია ქვეყანაში 4 მარტს უნდა გამოსულიყო.

"უკრაინაში არსებული კრიზისის ფონზე, WarnerMedia რუსეთში ბეტმენის დიდ ეკრანებზე გამოსვლას აჩერებს", — აცხადებს კომპანიის წარმომადგენელი, — "სიტუაციის განვითარებაზე დაკვირვებას განვაგრძობთ. ვიმედოვნებთ, ამ ტრაგედიას სწრაფად და მშვიდობიანად მოეღება ბოლო".

მოგვიანებით ასევე ცნობილი გახდა, რომ Sony Pictures-მა Morbius-ის და ყველა სხვა ფილმის დაგეგმილი პრემიერა რუსეთში შეაჩერა.

"უკრაინაში მიმდინარე სამხედრო ქმედებებისა და რეგიონში წარმოქმნილი არასტაბილური და კრიზისული სიტუაციის გათვალისწინებით, ვაჩერებთ რუსეთში დაგეგმილ პრემიერებს, მათ შორის, Morbius-ის ჩვენებას დიდ ეკრანზე", — აცხადებს Sony Pictures, — "ვფიქრობთ და ვლოცულობთ იმ ხალხზე, ვისზეც შექმნილმა სიტუაციამ იმოქმედა. ვიმედოვნებთ, კრიზისული სიტუაცია მალე დასრულდება".

Warner Bros.-ისა და Sony-ის გადაწყვეტილებას წინ უძღოდა Disney-ის განცხადება, რომ რუსეთში დაგეგმილ პრემიერებს, მათ შორის Turning Red-ის ჩვენებას (რომელიც 10 მარტს უნდა გამოსულიყო), აუქმებდა.

"სამომავლო გადაწყვეტილებებს სიტუაციის განვითარების მიხედვით მივიღებთ", — აცხადებს Disney, — "მანამდე კი, ლტოლვილების ახალი ნაკადით შექმნილ კრიზისულ ფონზე, ჩვენ ვთანამშრომლობთ პარტნიორ არასამთავრობო ორგანიზაციებთან, რათა ადამიანებს დაუყოვნებლივი პირველადი დახმარება გავუწიოთ".

პრემიერების გაუქმების გარდა, უცნობია, გაგრძელდება თუ არა უკვე გამოსული ფილმების ჩვენებები რუსეთში.

აღსანიშნავია, რომ თუმცაღა რუსეთი ჰოლივუდური ფილმებისთვის მაინცდამაინც დიდი ბაზარი არაა, ბეტმენის მსგავსი კინოსურათების შემოსავლისთვის ეს ტერიტორია მაინც მნიშვნელოვანია. გასულ წელს გამოსულმა ადამიანი-ობობას ახალმა ფილმმა რუსეთში $44 მილიონი გამოიმუშავა. ბეტმენისთვის კი, რომლის ბიუჯეტიც, დაახლოებით, $200 მილიონია, ხარჯების დასაბალანსებლად ჩრდილოეთ ამერიკის მიღმა ტერიტორიებზე ჩვენება მნიშვნელოვანია.