კულტურის მინისტრი, თეა წულუკიანი ჟურნალისტის კითხვაზე, იზიარებს თუ არა პრემიერმინისტრის პოზიციას უკრაინაში მიმდინარე მოვლენებთან დაკავშირებით, აცხადებს, რომ ის ეთანხმება ღარიბაშვილს. მისივე თქმით, პრემიერმინისტრი ცდილობს სერიოზულობით მართოს ქვეყანა, რომელიც ოკუპირებულია.

"ჩვენ ვცხოვრობთ ოკუპირებულ საქართველოში, დღეს უკრაინას სჭირს ის, რაც ჩვენ დაგვემართა უკვე არაერთი წლის წინ. თქვენ გახსოვთ 2008 წლის ომი, როდესაც თქვენი ბელადი ძირს ფორთხავდა, გარბოდა და მე მესმის, რომ თქვენ ეს აღარ მოგწონთ, მოგბეზრდათ და თავს აქიცინებთ, მაგრამ ისე იქცევით, რომ ყოველდღიურად საჭიროა ამის შეხსენება. ამის საპირისპიროდ დღეს ჩვენ გვყავს პრემიერმინისტრი, რომელიც სერიოზულობით ცდილობს მართოს ის ქვეყანა, რომელიც არის ოკუპირებული.

დღეს ევროპაში ომია, ჩვენი ქვეყანა არის ოკუპირებული და ჩვენ ვიღებთ იმ გადაწყვეტილებებს, რომელიც გამომდინარეობს, ქალბატონო ნინო, რაც არ უნდა გაგიკვირდეთ, თქვენი და თქვენი ოჯახის ინტერესიდან, ჩვენი ხალხის ინტერესიდან და იმ მომავალი თაობების ინტერესიდან, რომელმაც უნდა გააგრძელოს ამ ქვეყანაში ცხოვრება. ჩვენ უკვე გამოვლილი გვაქვს ნგრევა, სისხლი და ყველაფერს გავაკეთებთ იმისთვის, რომ ამ ქვეყანაში არ იყოს არეულობა და ომი", — მიმართა კულტურის მინისტრმა ჟურნალისტს.

პრემიერმინისტრ ირაკლი ღარიბაშვილის განცხადებით, რუსეთის მიმართ დასავლეთის დაწესებული სანქციები ეფექტური საშუალება არაა. მისი თქმით, უკრაინაში ომის შემჩერებელი დღეს არავინ არაა.

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში