უკრაინის თავდაცვის სამინისტრო მოსახლეობას კიევში WhatsApp-ში Viber-ში, Telegram-სა, Facebook-ზე ჯგუფებში "მტრის აგენტების" შესახებ აფრთხილებს.

უწყების განცხადებით, ისინი სხვადასხვა ფორუმსა და ჯგუფებში წევრებს მარშრუტების შესახებ ეკითხებიან, მათ შორის, იმაზე, თუ რა გზითაა შესაძლებელი კიევში მოხვედრა. უწყების ცნობით, ეს პირები ჯგუფებში ძირითადად 25 თებერვალს არიან დამატებულები.

"ავტორებს ერთი საერთო მახასიათებელი აქვთ: ყველა მათგანი ჯგუფის ახალი წევრია და მას 25 თებერვლიდან შემოუერთდა. ძირითადად, რუსულ ენაზე წერენ. ძვირფასო კიევის მაცხოვრებლებო, ფრთხილად იყავით.

პირები, რომლებიც ინფორმაციას ითხოვენ მტრის აგენტები არიან. არ მიუთითოთ მოძრაობის მარშრუტები, როგორ და სად უნდა მოხვდეთ და სად არის ჯერ კიდევ თავისუფალი და ხელმისაწვდომი გზა", — ნათქვამია განცხადებაში.

უწყება მოქალაქეებს მოუწოდებს, რომ ასეთის აღმოჩენის შემთხვევაში, ინფორმაცია ჯგუფის ადმინისტრატორს მიაწოდონ და კომენტარებში "დიდი ასოებით" დაწერონ, რომ ის მტერია, რომელიც ინფორმაციას აგროვებს.

26 თებერვალს რუსულმა საოკუპაციო ძალებმა რაკეტა ისროლეს კიევის მიმართულებითაც — დაიბომბა საცხოვრებელი კორპუსი. მსხვერპლზე ინფორმაცია, ჯერჯერობით, არ გავრცელებულა.

24 თებერვალს პუტინმა უკრაინაში ომი დაიწყო. კრემლში ამტკიცებენ, თითქოს მშვიდობიან მოსახლეობას თავს არ ესხმიან, რაც ტყუილია — იბომბება დასახლებები, ბაღები, სკოლები, საავადმყოფოები. რუსეთმა უკრაინას სხვადასხვა ტერიტორიიდან შეუტია და ახლა საომარი მოქმედებები ქვეყნის არაერთ რეგიონსა და ქალაქში მიმდინარეობს, მათ შორის, კიევის ოლქთან.

ორივე მხარეს არის დანაკარგები — დაიღუპა ასეულობით მშვიდობიანი მოქალაქე და სამხედრო პირი. რუსული ჯარები ცდილობენ ხელში ჩაიგდონ მნიშვნელოვანი ობიექტები, უკრაინა მათ წინააღმდეგობას უწევს. სამხედრო მოქმედებებს თან ახლავს კიბერშეტევები, დეზინფორმაციისა და პროპაგანდის ტალღა.

ვოლოდიმირ ზელენსკიმ ქვეყანაში ჯერ სამხედრო მდგომარეობა, შემდეგ კი საყოველთაო მობილიზაცია გამოაცხადა და თქვა, რომ იარაღს მისცემენ ყველას, ვისაც ქვეყნის დაცვა ენდომება. ზელენსკიმ არაერთხელ მოუწოდა პარტნიორებს დახმარებისა და სერიოზული ნაბიჯების გადადგმისკენ და აღნიშნა, რომ ომი არამხოლოდ უკრაინაში, არამედ ევროპაშია.

ევროკავშირმა, აშშ-მ, დიდმა ბრიტანეთმა, კანადამ, იაპონიამ, ავსტრალიამ, სამხრეთ კორეამ, ტაივანმა, ახალმა ზელანდიამ, გერმანიამ რუსეთს სანქციები დაუწესეს, რომელიც მოიცავს ფინანსურ შეზღუდვებს ფიზიკურ და იურიდიულ პირებზე, რუსულ ელიტაზე, ოლიგარქებზე, მსხვილ ბანკებზე, ავიაკომპანიებზე. უკრაინა უფრო ეფექტური ნაბიჯების გადადგმას ითხოვს. აშშ-მ დაასანქცირა ვლადიმერ პუტინი და სერგეი ლავროვიც.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში