აშშ-ის პრეზიდენტის, ჯო ბაიდენის განცხადებით, რუსეთის პრეზიდენტის, ვლადიმერ პუტინის სანქცირების საკითხი განიხილება. მისი თქმით, ეს არ არის "ბლეფი".

მიუხედავად ამისა, ბაიდენმა არ უპასუხა ჟურნალისტის კითხვას, რატომ არ უწესებენ პუტინს სანქციებს დღესვე.

როგორც ბაიდენმა ისაუბრა, რუსეთის 4 მსხვილ, მათ შორის, VTB ბანკს სანქციები დაუწესეს — რუსეთს გაეყინება ყველა აქტივი, რაც აშშ-ში აქვს. მისი თქმით, ბანკები, რომლებსაც სანქციები დაუწესეს, ჯამში 1 ტრილიონი დოლარის აქტივებს ფლობენ. ამასთან, აშშ სანქციებს უწესებს კრემლის ელიტასა და მათი ოჯახის წევრებს.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს. უკრაინული მედიისა და სახელმწიფო სტრუქტურების ინფორმაციით, თავდასხმები ხორციელდება არაერთ ქალაქში და იბომბება დასახლებული პუნქტები, მათ შორის კიევში. უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა და მოუწოდა ხალხს, არ აჰყვნენ პანიკას.

სიტუაცია მუდმივად იცვლება. ზელენსკი ამბობს, რომ რუსული საოკუპაციო ძალები ჩერნობილის ატომური ელექტროსადგურის რადიაციულ ზონაში შევიდნენ. იზრდება დაღუპულთა რიცხვიც — ხერსონის ოლქში დაბომბვის შედეგად დაიღუპა 13 ადამიანი, მათ შორის 2 ბავშვი და 9 სამხედრო მოსამსახურე. კიევთან ახლოს რუსეთის თავდასხმას კი 7 ადამიანი ემსხვერპლა.

გარდა ამისა, CNN ადგილზე მყოფ ჟურნალისტზე დაყრდნობით წერს, რომ რუსულმა საჰაერო-სადესანტო ძალებმა კიევთან ახლოს მდებარე ანტონოვის აეროპორტზე კონტროლი აიღეს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: