20 თებერვალს სოციალურ ქსელში გავრცელდა ვიდეო, სადაც ჩანს, როგორ ძალადობს სავარაუდოდ, ერთი სასულიერო პირი მეორეზე. კადრების მიხედვით, მოძალადემ იცის, რომ ვიდეოს იღებენ და გადამღებს ეუბნება კიდეც — "არ გათიშო, გადაიღე".

ვიდეო 4 წუთს გრძელდება და ამ დროის განმავლობაში, მოძალადე მეორე პირს სიტყვიერ და ფიზიკურ შეურაცხყოფას აყენებს და რამდენჯერმე ეკითხება — "რატომ ჩაიცვა ანაფორა". მოძალადე მსხვერპლს სახეში მუშტს და წიხლს ურტყამს და აგინებს. მსხვერპლი დახმარებას ითხოვს და გადამღებს სთხოვს, გააშველოს, თუმცა ის პროცესში არ ერევა.

ვიდეოს გავრცელების შემდეგ, შინაგან საქმეთა სამინისტრომ გამოძიება 2 მუხლით, სისხლის სამართლის კოდექსის 156-ე მუხლის მე-2 ნაწილის "ა" ქვეპუნქტითა და 157-ე მუხლის პირველი და მე-2 ნაწილებით, დაიწყო. მუხლები ძალადობით ან ძალადობის მუქარით ჩადენილი დევნასა და პირადი ცხოვრების ამსახველი საიდუმლოების უკანონოდ მოპოვებასა და სოციალური ქსელით გავრცელებას გულისხმობს.

საპატრიარქო ვიდეოს გამოეხმაურა და ამტკიცებს, რომ არცერთი პირი არ არის ბერად აღკვეცილი და უბრალოდ ყოფილი მორჩილები არიან. ისინი ფაქტს "უზნეოს და ყოვლადმიუღებელს" უწოდებენ და ამბობენ, რომ დეტალების დასაზუსტებლად "მიმდინარეობს აქტიური კომუნიკაცია შესაბამის ეპარქიასთან".

საპატრიარქოს თქმით, ძალადობა მიუღებელია როგორც ქრისტიანული, ისე მორალური და ადამიანური თვალსაზრისით, მით უმეტეს, როდესაც "ვიდეომასალაში ადამიანები საბერო შესამოსლით არიან წარმოდგენილნი".

ვიდეოში ასევე ისმის შალვა კეკელიას სახელი. მოძალადე მსხვერპლს ეკითხება: "პოლიციაში უჩივლე კეკელიას? მამა კეკელიას უჩივლე? რატომ?" რაზეც კეკელიამ კომენტარი ფორმულასთან გააკეთა და თქვა, რომ დადგმული სცენა ჰგონია.

როგორც კეკელია ამბობს, მსხვერპლი, რომელსაც ვიდეოში სცემენ, სემინარიის სასწავლებელში მოვიდა და სურდა, ლექციებზე თავისუფალი მსმენელი ყოფილიყო. მოგვიანებით კი კეკელიამ უარი უთხრა დასწრებოდა ლექციებს, ამ გადაწყვეტილებას ის ჰომოფობიური მოტივით ხსნის.