გუშინ, 16 აპრილს აირზენას თბილისი-მოსკოვის რეისის თვითმფრინავი, მოსკოვში ჩაფრენისას, მარჯვენა ბორბალით საფრენი ბილიკიდან გრუნტზე გადავიდა და გაჩერდა. როგორც კომპანიაში ამბობენ, თვითმფრინავი ამ დროს საფრენი ბილიკიდან სადგომისკენ მიემართებოდა.

"მგზავრების გადაყვანის მიზნით, იმავე ადგილზე მიადგეს ტრაპი და ავტობუსების მეშვეობით მგზავრები გადაიყვანეს ჩამოფრენილი მგზავრების ტერმინალში. არავითარ საფრთხეს ეს ინციდენტი მგზავრებისათვის არ წარმოადგენდა. ამის შემდეგ თვითმფრინავი გადაიყვანეს სადგომზე. უსაფრთხოების ზომებიდან გამომდინარე, ამ წუთამდე მიმდინარეობს შემოწმება, თუ რატომ მოხდა აღნიშნული ინციდენტი. მოსკოვიდან მომავალი მგზავრებისთვის თბილისიდან გუშინვე გაიგზავნა თვითმფრინავი და აღნიშნული მგზავრები თბილისში გუშინ გვიან ღამით დაბრუნდნენ," - ვკითხულობთ კომპანიის მიერ დღეს გავრცელებულ განცხადებაში.