მსახიობი ჯესიკა ჩესტეინი კანის კინოფესტივალს შეუერთდა, ის იმ ჟიურის წევრი იქნება, რომლის პრეზიდენტიც ესპანელი რეჟისორი, პედრო ალმოდოვარია.

"წელს 70-ე საიუბილეო ფესტივალია, ჩვენს გვერდით იქნებიან ის ადამიანები, ვინც კანის ისტორიის ნაწილია, ის ადამიანებიც ვინც ფესტივალმა აღმოაჩინა და ისინიც, ვისაც უბრალოდ ჩვენთან ერთად ყოფნა უნდა. ჩვენი ჟიურის წევრებიც ასე არიან, აქ არიან ქალები და კაცები, კინოს ისტორიის განუყოფელი ნაწილები მთელი მსოფლიოდან", - ამბობს კანის კინოფესტივალის პრეზიდენტი.

შეგახსენებთ, რომ კანის 70-ე კინოფესტივალის საკონკურსო სია რამდენიმე დღის წინ გახდა ცნობილი.

მთავარ საკონკურსო სექციაში მოხვდა უნგრელი რეჟისორის - კორნელი მუნდრუცუს ფილმი "იუპიტერის მთვარე", სადაც მთავარ როლს მერაბ ნინიძე თამაშობს.

კონკურში მონაწილეობას მსოფლიო მასშტაბით შერჩეული თვრამეტი ფილმი მიიღებს. მათ შორის არის ჰანეკესა და იზაბელ იუპერის მორიგი ერთობლივი კინოსურათი HAPPY END და სოფია კოპოლას ახალი ფილმი, სადაც მთავარ როლს ნიკოლ კიდმანი ასრულებს. ამავე კატეგორიაში არიან ფრანსუა ოზონის და მიშელ ჰაზანავიჩუსის ფილმები.

ფესტივალის ფარგლებში მაყურებელი ასევე დეივიდ ლინჩის ტვინ პიქსის ახალი სეზონის ორ სერიასაც იხილავს.

კანის კინოფესტივალზე ვანესა რედგრეივი მის სადებიუტო ფილმ Sea Sorrow-ს წარუდგენს მაყურებელს, ასევე შედგება კრისტენ სტიუარტის მოკლემეტრაჟიანი ფილმის Come Swim პრემიერაც.

აღსანიშნავია, რომ ლეგენდარული ფრანგი მსახიობი, ოსკარის ნომინანტი იზაბელ იუპერი პროგრამა Women in Motion-ის წლევანდელი სახე გახდა. რაც იმას ნიშნავს, რომ იუპერი ფესტივალს მნიშვნელოვანი მისიით დაესწრება - ის კანში ჩასულ ქალ კინოხელოვანებს კინოინდუსტრიაზე დაელაპარაკება.

კანის კინოფესტივალი წელს 17 მაისს დაიწყება.