ევროპარლამენტარის ვიოლა ფონ კრამონის განცხადებით, საწყენია, რომ საქართველო დემოკრატიის მხრივ უკუსვლას განაგრძობს. ამის შესახებ მან Twitter-ზე დაწერა და ასე გამოეხმაურა დემოკრატიის ინდექსზე The Economis-ის მიერ გამოქვეყნებულ მონაცემებს.

"საწყენია იმის ნახვა, რომ საქართველო დემოკრატიაში უკუსვლას განაგრძობს. მოლდოვას, უკრაინასა და სომხეთს უკეთესი მაჩვენებელი აქვს. ერთ დროს საქართველო რეგიონში მისაბაძი მაგალითი იყო, მაგრამ ახლა ავტორიტარული მეზობლების, რუსეთის, აზერბაიჯანისა და ლუკაშენკოს ბელარუსის მიმართულებით ვარდნას განაგრძობს", — წერს ის.

დემოკრატიის ინდექსში საქართველომ ქულა დაკარგა — ეს მაჩვენებელი 2021 წელს 5,12-ს შეადგენს, 2020 წელს კი 5,31 იყო. The Economist-ის მიერ გამოქვეყნებული მონაცემების მიხედვით, საქართველოს მსოფლიოში კვლავ 91-ე ადგილს იკავებს და ჰიბრიდულ რეჟიმადაა მიჩნეულია.