დღეს ორბელიანების სასახლეში ეროვნული თანხმობის პროცესის ფარგლებში სხვადასხვა სფეროს წარმომადგენელი ქალების მონაწილეობით პირველი საჯარო განხილვა გაიმართა. საქართველოს პრეზიდენტის, სალომე ზურაბიშვილის განცხადებით, "ყველას ყველასთან დაჯდომა და ერთმანეთის მოსმენა შეუძლია". მის სიტყვას პრეზიდენტის ადმინისტრაცია ავრცელებს.

ზურაბიშვილმა აღნიშნა, რომ პროცესს აქვს "კათარზისის როლი", რათა თქვან სიმართლე და შეცდომებსა თუ დანაშაულებში "ჩაიხედონ". მისი თქმით, ამის ფარგლებში "თემების აღმოჩენა" იქნება პირველი ნაბიჯი, რის შემდეგაც გავლენ რეგიონებში, უნივერსიტეტებში თუ სოფლებში. პრეზიდენტის განცხადებით, იარსებებს მთავარი პრინციპები და კრიტერიუმები, რომლებსაც პროცესში ჩართული ყველა ჯგუფი ხელს მოაწერს. მისი თქმით, ეს არ უნდა გადავიდეს პოლიტიკურ მსჯელობაში და "აკრძალულია ლანძღვა-გინება".

"იქნება სხვადასხვა თემატური ჯგუფები, რომლებიც დაიწყებენ საუბარს. მაგალითად, ვინც იყვნენ სხვადასხვა პერიოდში დაზარალებულები, რა არის მათი ხედვა? სახელმწიფოსგან რას ელოდებიან? და ვნახოთ, სახელმწიფოს რა და რა დოზით შეუძლია უპასუხოს, ესეც ძალიან მნიშვნელოვანია. არავინ უნდა დავრჩეთ უსამართლობის განცდაში, რადგან ესეც პოლარიზაციის ერთ-ერთი ძალიან დიდი მიზეზია", — ამბობს ის.

როგორც განცხადებაში ვკითხულობთ, "ეს უნდა იყოს ცოცხალი, ინკლუზიური და თავისუფალი" პროცესი, სადაც ტაბუდადებული თემა არ იქნება. ზურაბიშვილი აცხადებს, რომ საუბრის ფორმატში უნდა გამოვლინდეს ის თემები, რომლებიც პოლარიზაციის მთავარი ღერძი და საფუძველია.

პრეზიდენტმა ასევე ისაუბრა იმაზე, თუ რატომ მონაწილეობდნენ დღევანდელ შეხვედრაში მხოლოდ ქალები. მისი თქმით, საქართვლოს აქვს "ისტორიული ტრადიცია, რომ ქალებს ძალიან რთულ მომენტებში, ძალიან რთული როლი ჰქონდათ".

"ვწუხვარ, რომ დღეს მთავრობაში, პარლამენტსა და ადგილობრივ ხელისუფლებაში ძალიან ცოტა ქალია. ეს არასწორია იმ ქვეყანაში, სადაც ყველა დარგში ქალები ძლიერად არიან წარმოდგენილნი. მათი ადგილი პოლიტიკაში კი, არ ასახავს მათ როლს საზოგადოებაში. იმედია, ეს დისბალანსი ახლო მომავალში გამოსწორდება.

ბოლო პერიოდში, ქალებს სიძულვილის ენა ყველაზე მეტად შეეხოთ, ამიტომ ქალებმა უფრო კარგად იციან, რამდენად დამანგრეველი და მიუღებელია სიძულვილის ენა, მათ იციან როგორ განიცდიან შვილები, როცა დედას საჯაროდ ლანძღავენ და ეს ამ ქვეყნისა და მისი კულტურისთვის სრულიად მიუღებელია.

ქალებს ოჯახის მიმართ სხვა პასუხისმგებლობა აქვთ და სხვანაირად ფიქრობენ ხვალინდელ ქვეყანაზე, სხვანაირად ფიქრობენ იმაზე, გაუძლებს თუ ვერა ეს ქვეყანა ყველა ამ გამოწვევებს. ამიტომ მათი იმედი მაქვს. და ბოლოს, ქალებში უფრო მეტი ემპათია და მეტი მოსმენის უნარია, რაც დღეს ძალიან გვჭირდება", — თქვა მან.

ამასთან, როგორც ზურაბიშვილი ამბობს, მზად არის შეიქმნას ერთობლივი დოკუმენტი, რომელსაც პარლამენტში მიიტანს. მისი თქმით, დოკუმენტი ამ პროცესის ერთ-ერთი მთავარი შედეგი იქნება, სადაც გაწერილი უნდა იყოს საზოგადოების მოთხოვნები და პუნქტები, თუ რაზე თანხმდებიან.