წინა წლის შესაბამის პერიოდთან შედარებით, 2016 წლის აპრილში რეალური მთლიანი შიდა პროდუქტის ზრდის ტემპმა 4,3% შეადგინა. საქართველოს სტატისტიკის ეროვნული სამსახური ეკონომიკური ზრდის აპრილის თვის წინასწარ შეფასებას აქვეყნებს.

მონაცემების მიხედვით, 2016 წლის პირველი კვარტალის საშუალო რეალურმა ზრდამ 2,3%, ხოლო 2016 წლის პირველი ოთხი თვის საშუალო რეალურმა ზრდამ 2,8% შეადგინა.

ფოტო: საქსტატი

როგორც საქსტატი განმარტავს, ეკონომიკური ზრდის ყოველთვიური წინასწარი შეფასება უწყებრივი სტატისტიკის, დღგ-ის გადამხდელი საწარმოების ბრუნვების, ფისკალური და მონეტარული მონაცემების საფუძველზე იანგარიშება. ამ ტიპის პრაქტიკას მოკლევადიანი წინასწარი ოპერატიული მონაცემების მისაღებად იყენებენ.

საქსტატის განცხადებით, რეალური კვარტალური გაანგარიშებები შესაძლოა განსხვავდებოდეს წინასწარი შეფასებისგან, რადგან იმ სფეროებში, სადაც ყოველთვიური მონაცემები, მაგალითად, სოფლის მეურნეობა, არ მოიპოვება, შეფასება გაკეთებულია წინა პერიოდის მონაცემებზე დაყრდნობით.