საქართველოს უსაფრთხოების სამსახურში ამბობენ, რომ მათი უმთავრესი პრიორიტეტი ტერორიზმის წინააღმდეგ ბრძოლაა, თუმცა, აღნიშნავენ, რომ საქართველო არ მიეკუთვნება თავდასხმის მაღალი რისკის ქვეყანათა რიცხვს. ამის შესახებ სუს-ის 2016 წლის ანგარიშში წერია.

ანგარიშში აღნიშნულია, რომ "ისლამურმა სახელმწიფომ" და სხვა ექსტრემისტულმა დაჯგუფებებმა საქართველოს ცალკეულ რეგიონებში მხარდამჭერთა გარკვეული რაოდენობა შეიძინეს.

"რადიკალური იდეოლოგიების გამავრცელებლები ცდილობენ, საზოგადოების გარკვეული ნაწილის რელიგიური შეხედულებები და დაბალი ცნობიერება საკუთარი ინტერესების შესაბამისად გამოიყენონ," - ვკითხულობთ ანგარიშში.

სტატისტიკური მონაცემებით, 2016 წელს ტერორისტული აქტივობების საფუძველზე გამოძიება ცხრა საქმეზე დაიწყო. სუს-ში აღნიშნავენ, რომ, ამავე პერიოდში, "ისლამური სახელმწიფოს" მხარდამჭერის უცხოეთში მცხოვრები საქართველოს მოქალაქეები გამოავლინეს, რომლებიც, ინტერნეტის საშუალებით, ტერორისტულ ორგანიზაციების იდეოლოგიას მხარს უჭერდნენ. ამავე პერიოდში, სუს-მა კონტრტერორისტული მიმართულებით საქართველოს საზღვარზე კონტროლზე აიყვანა 1 500 პირი, 750-ს კი შემოსვლა აუკრძალა.