დროას ლიდერი, ელენე ხოშტარია მოქალაქეებს უკრაინის მხარდაჭერის ნიშნად დროშებზე ხელმოწერების გაკეთებასა და მათ კიევში წაღებას სთავაზობს. ამის შესახებ მან საკუთარ Facebook-ზე დაწერა და აღნიშნა, რომ ხვალ პარლამენტთან შეიკრიბებიან.

"მეგობრებო, გთავაზობთ ასეთ რამეს: ხვალ 12 საათიდან 3 საათამდე რუსთაველზე პარლამენტის წინ გამოვიტანთ საქართველოსა და უკრაინის დროშებს, თქვენ შეგიძლიათ მობრძანდეთ, მოაწეროთ ხელი უკრაინის მხარდაჭერის ნიშნად და ამ დროშას ჩვენ წავიღებთ კიევში და გადავცემთ რადას წევრებს. საშუალება გექნებათ, ამ სახით გაუგზავნოთ მხარდაჭერა უკრაინელებს და დააფიქსიროთ საქართველოს პოზიცია", — წერს ხოშტარია.

უკრაინის საზღვრებთან სიტუაცია უფრო და უფრო იძაბება. 26 იანვარს რუსეთმა ბელარუსში სამხედრო ძალები განათავსა, რითიც უკრაინის ჩრდილოეთით შეიქმნა ახალი სავარაუდო ფრონტი თავდასხმისთვის. რუსეთი კი ამტკიცებს, რომ უკრაინაში შეჭრას არ გეგმავს, ამავდროულად კი დასავლეთი მკაცრი ეკონომიკური სანქციებით იმუქრება. ბოლო ინფორმაციით, რუსეთს უკრაინის საზღვრებთან 100 ათასამდე სამხედრო ჰყავს მობილიზებული.

ამის ფონზე, დღეს, პირველ თებერვალს საქართველოს პარლამენტმა მიიღო უკრაინის მხარდამჭერი რეზოლუცია, სადაც რუსეთი ნახსენები არ არის.

უკრაინის მხარდამჭერი რეზოლუციის შემუშავების ინიციატივა ოპოზიციური ფრაქციების ლიდერებს ეკუთვნით. 24 იანვარს გამართულ ბრიფინგზე მათ მმართველ პარტიას ერთიანი ტექსტის შემუშავება შესთავაზეს, თუმცა შეთანხმება ვერ მოახერხეს.

რეფორმების ფრაქციის წევრის, ხათუნა სამნიძის ინფორმაციით, ქართულმა ოცნებამ მათ საკუთარი ვერსია შესთავაზა და განხილვის შემდეგ ისინი პრინციპულ საკითხებზე შეთანხმდნენ. თუმცა, მისივე თქმით, შესვენების დროს "ოცნების" დეპუტატებმა გადაწყვიტეს ტექსტის თავდაპირველი ვერსია დაებრუნებინათ, რის გამოც ოპოზიციამ თანაავტორობაზე უარი თქვა.

გაიგე მეტი: