პარტია მოქალაქეების ლიდერი, ალეკო ელისაშვილი აცხადებს, რომ მიხეილ სააკაშვილის საკითხზე საგამოძიებო კომისიის შექმნას მხარს არ დაუჭერენ.

"ჩვენ მხარს არ ვუჭერთ საგამოძიებო კომისიის შექმნას სააკაშვილის წამების ფაქტზე. კი, ცუდად მოექცნენ, უღირსად მოექცნენ, არაადამიანურად მოექცნენ სააკაშვილს იმ გადაყვანის დროს, მაგრამ წამება, ტანჯვა და მარტვილობა, ეს გაბუქება ძალიან მიუღებელია და შესაბამისად, ამას მხარს არ ვუჭერთ", — განაცხადა მან რუსთავი 2-ის კითხვაზე.

ფრაქცია ერთიანი ნაციონალური მოძრაობა საპარლამენტო ბოიკოტს წყვეტს და საპარლამენტო საგაზაფხულო სესიაში ჩაერთვება. ამის შესახებ განცხადება პარტიის ერთ-ერთმა ლიდერმა, ხატია დეკანოიძემ გააკეთა.

მისივე თქმით, ფრაქციის საპარლამენტო საქმიანობის ერთ-ერთი ძირითადი ღერძი იქნება მიხეილ სააკაშვილის საკითხი. დეკანოიძის განცხადებით, საგამოძიებო კომისიას დღესვე დაარეგისტრირებენ.