საქართველოს პროკურატურამ, ზუგდიდში ქალზე ძალადობის ბრალდებით პოლიციის თანამშრომელი დააკავა. ეს ის პოლიციელია, რომელიც გავრცელებულ ვიდეოში ქალს სცემდა.

"პროკურატურის მიერ ჩატარებული გამოძიებით დადგენილია, რომ 25 იანვარს ქ. ზუგდიდში, პოლიციის თანამშრომელმა გ.ბ.-მ პირად საკითხზე წარმოშობილი კონფლიქტის დროს მეგობარ ქალს მ.თ.-ს სახეში ხელი რამდენჯერმე დაარტყა", — აცხადებენ უწყებაში.

მათივე ინფორმაციით, პოლიციელი დააკავეს ცემის ან სხვაგვარი ძალადობის ბრალდებით, რომელმაც დაზარალებულის ფიზიკური ტკივილი გამოიწვია (სისხლის სამართლის კოდექსის 126-ე მუხლის პირველი ნაწილი). დანაშაული ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთ წლამდე, იარაღთან დაკავშირებული უფლებების შეზღუდვით ან უამისოდ.

"დაკავებულს ბრალდება კანონით დადგენილ ვადაში წარედგინება, რის შემდეგაც პროკურატურა აღკვეთის ღონისძიების გამოყენების თაობაზე სასამართლოს შუამდგომლობით მიმართავს", — აცხადებენ უწყებაში.

გუშინ, 25 იანვარს, სოციალურ ქსელში გავრცელდა ვიდეო, სადაც ჩანს, რომ კაცი, რომელსაც, სავარაუდოდ, პოლიციის ფორმა აცვია, ქალზე ფიზიკურად ძალადობს. ის ქალს სახეში რამდენჯერმე ურტყამს და ეჩხუბება. პროკურატურამ გამოძიება გუშინვე დაიწყო.