პარლამენტის თავმჯდომარის, შალვა პაპუაშვილის განცხადებით, ევროპარლამენტარებთან შეხვედრა მისი მოუცლელობის გამო არ ჩაშლილა. მისი თქმით, პროცესი უნდა წარიმართოს იმ წესების და ფორმატის მიხედვით, რომელიც არსებობს ჯან მონეს დიალოგში.

კითხვაზე იყო თუ არა მიზეზად დასახელებული მისი მოუცლელობა, პაპუაშვილი ამბობს — "რა თქმა უნდა, მიზეზი ეს არ ყოფილა".

"ჟან მონეს დიალოგი წარმოადგენს ფორმატს საქართველოს პარლამენტს თავმჯდომარის და ევროპარლამენტის თავმჯდომარეს შორის და ამიტომ, საჭიროა, რომ ეს შეთანხმებით შედგეს მანამ სანამ იქნება ასეთი სახის ღონისძიება დაგეგმილი და ეს კომუნიკაცია გვქონდა მათ შორის ამ ჯგუფთანაც.

როდესაც შევიტყვეთ, რომ აპირებდნენ ჩამოსვლას, მაშინვე შევატყობინეთ, რომ ჯერ საჭიროა, მით უმეტეს როცა ახალარჩეული თავმჯდომარე ჰყავს ევროპარლამენტს, ისევე როგორც საქართველოს პარლამენტს. იცით, რომ დიალოგი ჯერ დაწყებული არ არის, ფორმალურად ამას სჭირდება ევროპარლამენტის თავმჯდომარის და საქართველოს პარლამენტის თავმჯდომარეს შორის მემორანდუმის გაფორმება და სწორედ ეს მიზეზები მოვახსენეთ ჩვენ შესაბამის ჯგუფს", — თქვა მან TV პირველთან.

ჟან მონეს დიალოგის ფასილიტატორმა ევროპარლამენტარებმა განაცხადეს, რომ საქართველოს პარლამენტი პროცესის დაწყებას აჭიანურებს. მათი თქმით, საქართველოში 21-22 იანვარს დაგეგმილი ვიზიტი გადაიდო, რადგან პარლამენტის თავმჯდომარემ, შალვა პაპუაშვილმა დრო არ გამონახა.

22 იანვარს კი საქართველოს პარლამენტის თავმჯდომარის, შალვა პაპუაშვილის კაბინეტმა აღნიშნა, რომ 21 იანვარს ევროპარლამენტარების მიერ გავრცელებული განცხადება "პოლარიზაციის რისკებს ზრდის და დიალოგის დაწყების პროცესს ხელს არ უწყობს"

ამავე თემაზე: