მოდის სამყაროს ერთ-ერთი უმნიშვნელოვანესი ფიგურა და ბრენდ მუგლერის დამაარსებელი ტიერი მუგლერი 23 იანვარს 73 წლის ასაკში გარდაიცვალა. ამის შესახებ ინფორმაცია ბრენდმა ინსტაგრამზე გაავრცელა და დიზაინერს გამოემშვიდობა.

"მუგლერის მოდის სახლი უდიდესი მწუხარებით იუწყება, რომ გარდაიცვალა მენფრედ ტიერი მუგლერი. მისი, როგორც მაღალი მოდის დიზაინერის, სუნამოებისა და სტილის შექმნელის წარმოსახვის უნარმა მსოფლიოში უამრავ ადამიანს მისცა შესაძლებლობა, ყოველდღიურად უფრო გაბედულები ყოფილიყვნენ და მეტი ეოცნებათ", — ვკითხულობთ განცხადებაში.

მუგლერმა საკუთარი ბრენდი 1973 წელს დააარსა და მაღალი მოდის ერთ-ერთ ყველაზე გავლენიან ფიგურადაც იქცა. მან ბრენდი 2002 წელს დატოვა, თუმცა 2013 წელს მრჩევლის სტატუსით კვლავ დაბრუნდა.

ბრენდის დატოვების მიუხედავად, მუგლერს სამოსის შექმნა არ შეუწყვეტია. ის ისეთი ცნობილი ადამიანების კოსტიუმებზე მუშაობდა, როგორებიც არიან ბიონსე, კიმ კარდაშიანი, ქარდი ბი, ლედი გაგა და ა.შ.

დიზაინერობის გარდა, მუგლერი რეჟისორი, ფოტოგრაფი, მოცეკვავე და აკრობატი იყო. ის ხშირად ამბობდა, რომ სურდა, ადამიანის სხეული ისევე შეესწავლა, როგორც ხელოვნება.