ფრაქცია ლელო — პარტნიორობა საქართველოსთის უკრაინის მხარდამჭერ წერილს აქვეყნებს. წერილი უკრაინის პრეზიდენტის, ვოლოდიმირ ზელენსკისა და რადას თავმჯდომარის, რუსლან სტეფანჩუკის სახელზეა დაწერილი და პარტიის ლიდერები ხვალ მას უკრაინის ელჩს, იგორ დოლგოვს გადასცემენ.

"ჩვენ პატივს ვცემთ უკრაინის ტერიტორიულ მთლიანობას თავის საერთაშორისოდ აღიარებულ ფარგლებში და მკაცრად ვგმობთ მის წინააღმდეგ წარსულში თუ აწმყოში განხორციელებული აგრესიის ყველა აქტს. ჩვენ მხარს ვუჭერთ უკრაინელი ხალხის ისტორიულ ბრძოლას დამოუკიდებლობის, თავისუფლებისა და დემოკრატიისათვის და თქვენს გეოპოლიტიკურ გადაწყვეტილებას მყარად დაიმკვიდროთ უკრაინის კუთვნილი ადგილი ერთიან და თავისუფალ ევროპაში", — ვკითხულობთ მხარდამჭერ ნოტაში.

წერილში ნათქვამია, რომ რუსეთი საფრთხეს უქმნის არა მხოლოდ უკრაინის ტერიტორიულ მთლიანობას, არამედ საერთაშორისო წესრიგს, სუვერენულობის იდეასა და საერთაშორისო სამართლის პრინციპებს.

"მოახლოებული საფრთხე არამარტო უკრაინისკენ მოემართება, არამედ რუსეთის ფედერაციის სამეზობლოში მდებარე ყველა თავისუფალ სახელმწიფოსა და სრულიად აღმოსავლეთ ევროპას აყენებს რისკის ქვეშ. ვუყურებთ რა თავისუფლების მოყვარე უკრაინელი და ქართველი ხალხის გეოპოლიტიკურ დასჯას მათ მიერ ევრო-ატლანტიკური ინტეგრაციის გზაზე მიღწეული წარმატების გამო, ეს რთული დრო ჩვენგან ერთობასა და ხასიათის სიმტკიცეს მოითხოვს. თუმცა, სირთულეები მხოლოდ აძლიერებს ამ ისტორიულ გზაზე წარმატების მიღწევის ჟინს", — წერია განცხადებაში.

წერილში ყურადღებაა გამახვილებული საქართველოსა და უკრაინის საერთო ბრძოლაზე ეროვნული სუვერნულობისა და თავისუფლების მისაღწევად. ლელოს ფრაქციის ლიდერები აღნიშნავენ, რომ ქართველ ხალხს ახსოვს უკრაინის მხარდაჭერა 2008 წლისა და 1990-იანი წლების ომის დროს.

"ლელოს ლიდერები, სასიცოცხლოდ მნიშვნელოვნად მივიჩნევთ უკრაინასა და საქართველოს შორის ორმხრივი კავშირებისა და სტრატეგიული პარტნიორობის შემდგომ გაღრმავებას, როგორც პოლიტიკური, ასევე ეკონომიკური და სამხედრო მიმართულებებით. ჩვენ სრულ მხარდაჭერას ვუცხადებთ საქართველოს გაზრდილ ჩართულობას ასოცირებული ტრიოს არსებულ ფორმატში ევროკავშირთან, ისევე როგორც სხვა რელევანტურ ფორმატებში და მნიშვნელოვნად მივიჩნევთ, რომ ჩვენმა ორმა სახელმწიფომ გაიღოს საერთო ძალისხმევა შავი ზღვის უსაფრთხოების უზრუნველსაყოფად და საქართველოსა და უკრაინის ევროკავშირსა და NATO-ში ინტეგრაციის მისწრაფების გასაძლიერებლად", — წერია განცხადებაში.

უკრაინის ელჩს საქართველოში, იგორ დოლგოვს ხვალ ბადრი ჯაფარიძე, სალომე სამადაშვილი და გრიგოლ გეგელია შეხვდებიან.

გაიგე მეტი:

• ჩვენ ვდგავართ უკრაინის გვერდით — ზალკალიანი
• სერიოზული შედეგი მოჰყვება უკრაინაში შეჭრასა და მარიონეტული რეჟიმის დამყარების მცდელობას — რააბი
• კრემლი გეგმავს უკრაინაში პრორუსი ლიდერი დანიშნოს — დიდი ბრიტანეთი
• ლავროვის უწყება დიდი ბრიტანეთის საგარეოს "პროვოკაციების შეწყვეტისკენ" მოუწოდებს