თუ 90-იანების ბავშვი ხართ, დიდი შანსია ტამაგოჩი გყოლოდათ, რომელიც სავარაუდოდ ყოველ მეორე დღეს გიკვდებოდათ, მაგრამ ძალიან გიყვარდათ და თქვენი მეგობრები ან კლასელები მუდმივად გიჭამდნენ ტვინს, რომ მათთვის გეთხოვებინათ ან თქვენი ციფრული მეგობრის გამოკვების უფლება მიგეცათ.

ბნელ 90-იანებში ტამაგოჩი ერთ-ერთი ნათელი წერტილი იყო, თუ მოგენატრათ ან მაშინ არ გქონიათ, მაშინ ახლა ახალი შანსი გეძლევათ.

იაპონური კომპანია Bandai, რომელიც ამ სათამაშოს აწარმოებდა ბაზარზე ორიგინალ ტამაგოჩის უშვებს, უფრო სწორად, უკვე გაუშვა და იაპონიაში დახლებიდან დაიტაცეს კიდეც.

"მაშინვე გაიყიდა, ხალხი ვერ ერთმანეთს ხელიდან სტაცებენ", - წერს ერთ-ერთი იაპონელი მომხმარებელი.

ახალი ტამაგოჩები ძველისგან მხოლოდ ზომით განსხვავდება. საიუბილეო სათამაშოები, ორიგინალთან შედარებით, ორჯერ პატარაა.

ფოტო: BANDAI

პირველი ტამაგოჩი 1996 წელს იაპონიაში გამოუშვეს, სათამაშო მალევე გაპოპულარულდა, რის შემდეგაც, 1997 წელს, აშშ-სა და ევროპაშიც გამოუშვეს. 1997 წელს სათამაშო $18 ღირდა, ხოლო ახალი ფასი $13 იქნება.