ნაციონალური მოძრაობის თავმჯდომარის, ნიკა მელიას განცხადებით, პარტიის წარმატებას მხოლოდ რეორგანიზაციაში ხედავს. მისი თქმით, ეს ეხება არა მხოლოდ საკადრო რეფორმებს, არამედ ხედვის კორექტირებასაც. როგორც მან აღნიშნა პარტია ნაციონალურმა მოძრაობამ ყოველდღიური მუშაობა უნდა ისწავლოს.

"დღემდე და სამწუხაროდ, არა მხოლოდ ნაციონალური მოძრაობა, ეს შეგიძლიათ აღიარებით ჩვენებად ჩამითვალოთ ან ზედმეტ გულწრფელობად, როგორც გენებოთ, მაგრამ უნდა ვთქვა სიმართლე, ქართულ პოლიტიკაში ყველა ოპოზიციური და სახელისუფლებო პარტია საერთოდ ასე იქცევა, მხოლოდ არჩევნებამდე 2-3 თვით ადრე აქტიურდება. უკეთეს შემთხვევაში 4 თვით ადრე. არჩევნებიდან არჩვენებამდე ვცხოვრობთ, რაც არ არის საკმარისი იმისთვის, რომ ნდობა საზოგადოებაში გაზარდო", — აღნიშნა მელიამ ფორმულას ეთერში.

მისი თქმით, თუ სურთ, რომ საზოგადოების მნიშვნელოვანმა ნაწილმა მათში ალტერნატივა დაინახოს, პარტია ყოველდღიურად "საარჩევნო რეჟიმში" უნდა იყოს და გადამწყვეტი ეტაპისთვის ემზადებოდეს.

ნაციონალურ მოძრაობაში სტრუქტურული ცვლილებებია. 10 იანვარს პოლიტიკური საბჭოს თავმჯდომარედ კობა ნაყოფია, გენერალურ მდივნად კი პეტრე ცისკარიშვილი აირჩიეს. ამასთან, ნიკა მელია გარკვეული პერიოდით თბილისის რაიონული ორგანიზაციის თავმჯდომარეობას შეითავსებს.