ლეიბორისტული პარტიის ლიდერი, შალვა ნათელაშვილი პარლამენტში შესვლის შემთხვევაში, 40-წუთიანი სიტყვის უფლებას ითხოვს. ის კიდევ ერთხელ აღნიშნავს, რომ ოპოზიციის პარლამენტში შესვლამ ბოიკოტს აზრი დაუკარგა.

"გამოკითხვა მიმდინარეობს, ძალიან აქტიურად მონაწილეობს ხალხი ამ პროცესში, ალბათ, საგაზაფხულო სესიამდე, ჩვენ უკვე ჩამოვყალიბდებით. საგაზაფხულო სესია თებერვალში იხსნება, თუმცა, უპირველესი მოთხოვნა, რაც ჩვენ გვაქვს და ოფიციალურად წარვადგენთ ამას, მინიმუმ 40-წუთიანი სიტყვის უფლება, როგორც კი პარლამენტში შევალ. არავინ წარმოიდგინოს, რომ მე იქ შევალ, თუ ასე მოხდა, და დავჯდები ჩუმად", — განაცხადა მან ბრიფინგზე.

შალვა ნათელაშვილი პარლამენტში შესვლასთან დაკავშირებით, ფეისბუქგვერდზე გამოკითხვას 10 იანვრიდან ატარებს. ფეისბუქზე მან დასვა კითხვა — "მას შემდეგ რაც ყველა ოპოზიციურმა პარტიამ პარლამენტში შესვლით აზრი დაუკარგა ბოიკოტს, ფიქრობთ თუ არა, რომ ლეიბორისტულმა პარტიამ უნდა გამოიყენოს თავისი მანდატი და შესაბამისად, მე შევიდე პარლამენტში?" — და აცხადებს, რომ პარტია საბოლოო გადაწყვეტილებას სწორედ დაფიქსირებული პოზიციის გათვალისწინებით მიიღებს.

ნათელაშვილმა, რომელიც პარლამენტში შესვლის კატეგორიული წინააღმდეგი იყო და ოპოზიციას ამ გადაწყვეტილების გამო აკრიტიკებდა, 6 იანვარს განაცხადა, რომ პარლამენტში შესვლა მისთვის "სიკვდილი და შეურაცხყოფაა", მაგრამ როცა საქმე ქვეყნის ინტერესებზეა "პირადი ემოცია და შეურაცხყოფა ხანდახან მეორეხარისხოვანია". მისი თქმით, პარტიაში მიდის მსჯელობა პარლამენტში შესვლასთან დაკავშირებით, მიუხედავად იმისა, რომ ის თანახმა არ არის, მზადაა, ეს ნაბიჯი გადადგას.

ამავე თემაზე: