ლელოს ლიდერის, მამუკა ხაზარაძის განცხადებით, ის სასამართლო დავა, რაც მათ წინააღმდეგ ბოლო 3 წლის მანძილზე გრძელდება, "დადგმული შოუა", რათა ქვეყანაში შექმნილი მძიმე მდგომარეობა გადაიფაროს. მისი თქმით, როგორადაც არ უნდა დასრულდეს დღევანდელი პროცესი, ქართული ოცნების დამფუძნებელმა, ბიძინა ივანიშვილმა "რეალურად წააგო".

"წააგო იმიტომ, რომ ვერ შეგვაშინა, ვერ გაგვაჩერა, ვერ გაგვტეხა და უფრო მეტი მოტივაცია მომცა მე და ჩემ თანაგუნდელებს, ბადრის, რა თქმა უნდა, რომ გავაგრძელებთ ბრძოლას, რომ ის, რაც ქვეყანაში ხდება პოსტსაბჭოური მენტალიტეტი დამთავრდეს ამ ქვეყანაში, ამ ქვეყანამ მიიღოს სამართლიანი არჩევნები, ამ ქვეყანამ მიიღოს სამართლიანი მართლმსაჯულება, სამართლიანი სასამართლო და არა ის პროკურატურა, ის მოსამართლეები, რომლებიც ბიძინა ივანიშვილმა გადმოიბარა წინა ხელისუფლებიდან", — განაცხადა მან.

დღეს ხაზარაძე-ჯაფარიძე-წერეთლის ე.წ. ფულის გათეთრების საქმეზე ბოლო სასამართლო სხდომა იმართება. პროცესი 11:00 საათზე იყო ჩანიშნული.

ბადრი ჯაფარიძეს, მამუკა ხაზარაძესა და ავთანდილ წერეთელს პროკურატურა ფულის გათეთრებას ედავება. 2019 წლის 8 იანვარს გავრცელდა ინფორმაცია, რომ პროკურატურამ თიბისი ბანკიდან დოკუმენტები ამოიღო. მაშინ პროკურატურამ განმარტა, რომ თიბისი ბანკის 2008 წლის აქტივობები შეიცავდა ფულის გათეთრების ნიშნებს და მასში თიბისის დამფუძნებლები და ამავდროულად, სამეთვალყურეო საბჭოს თავმჯდომარე, მამუკა ხაზარაძე და მისი მოადგილე ბადრი ჯაფარიძე ფიგურირებდნენ.