მსოფლიოს ნომერ პირველი ჩოგბურთელი, ნოვაკ ჯოკოვიჩი, რომელიც ავსტრალიის ღია პირველობაზე მიემგზავრებოდა, ქვეყანაში არ შეუშვეს.

ჯოკოვიჩი აეროპორტში რამდენიმე საათი ალოდინეს, შემდეგ კი განუცხადეს, რომ ავსტრალიაში შესვლის წესებს ვერ აკმაყოფილებდა. ჩოგბურთელი სასტუმროში გადაიყვანეს, ხოლო მისი დეპორტაციის საკითხს სასამართლო ორშაბათს გადაწყვეტს.

ჯოკოვიჩი ვაქცინაციის სტატუსის შესახებ საჯაროდ არ საუბრობს, მაგრამ გასულ წელს მან განაცხადა, რომ "ვაქცინაციის წინააღმდეგი" იყო. ავსტრალიის ღია პირველობის ორგანიზატორებმა გარკვეული ჯანმრთელობის პრობლემების გამო მისი აცრის სტატუსთან დაკავშირებით გამონაკლისი დაუშვეს. ამ გადაწყვეტილებამ ავსტრალიელთა უმეტესობა გააღიზიანა, რადგან ქვეყნის მოსახლეობის 90% სრულად არის ვაქცინირებული და ისინი საკმაოდ მკაცრ წესებს იცავენ.

სასაზღვრო დაწესებულების ოფიციალური პირების თქმით, ჯოკოვიჩმა "ქვეყანაში შესასვლელად შესაბამისი მტკიცებულება ვერ წარმოადგინა". ამ ამბავს ავსტრალიის პრემიერ-მინისტრიც გამოეხმაურა, რომელმაც აღნიშნა, რომ "წესი ყველასთვის წესია".

ავსტრალიის ღია პირველობის ჩემპიონატი 17 იანვრიდან დაიწყება. შეგახსენებთ, რომ ჯოკოვიჩმა ჩემპიონატი უკვე 9-ჯერ მოიგო.