Google ის კომპანიაა, რომლისგანაც მსგავსი ტიპის დარღვევებს, როგორიცაა სახელფასო უფსკრული მის ქალ და კაც თანამშრომლებს შორის, ნაკლებად მოელი. მაგრამ, როგორც აშშ-ს შრომის დეპარტამენტმა აღმოაჩინა, კომპანიაში ეს საკითხი იმდენად მწვავედ დგას, რომ გადაწყვიტა საქმე სასამართლოში გაერჩია.

წინასწარი მოსმენის დროს, შრომის დეპარტამენტის წარმომადგენლებმა სასამართლოდ განუცხადეს, რომ იმავე პოზიციისა და კვალიფიკაციის მამაკაცებსა და ქალებს შორის არსებული სახელფასო უფსკრული კომპანიაში სისტემურ ხასიათს ატარებს, აბსოლუტურად ყველა დონეზე. მოსარჩელე მხარემ არგუმენტად 2015 წლისა და შემდგომი პერიოდის ხელფასები მოიყვანეს და სასამართლოს მიმართეს შუამდგომლობით, დაევალებინა გუგლისთვის სხვა წლების ამონაწერის წარმოდგენაც.

გუგლი მთავრობის კონტრაქტორიცაა და ამიტომ ვალდებულია დეპარტამენტს გარკვეული მასალა მიაწოდოს. სწორედ ამ მასალების შესწავლის შემდეგ მივიდა შრომის დეპარტამენტი აღნიშნულ დასკვნამდე და საქმის დეტალურად შესწავლისთვის კომპანიას დამატებითი ინფორმაცია მოსთხოვა, თუმცა გუგლმა თანამშრომლობაზე უარი განაცხადა. მათი თქმით, დეპარტამენტს საკმარისი მასალა ჰქონდა და შესაბამისად, მეტი ინფორმაციის გაცემის ვალდებულება აღარ არსებობდა. სწორედ ამის შემდეგ მიმართა აშშ-ს შრომის დეპარტამენტმა სასამართლოს.

თავად გუგლი ბრალდებას უარყოფს და სახელმწიფო სტრუქტურის მეთოდოლოგიასა და მასალას ეჭვქვეშ აყენებს.