2022 წელი ჰოგვორტსში დაბრუნებით დავიწყეთ. ჰარი პოტერის პირველი ფილმის გამოსვლიდან 20 წლის იუბილეს აღსანიშნავად 1-ლ იანვარს სპეციალური გადაცემა გამოვიდა, რომელმაც ბლოკბასტერების სერიაში მონაწილე მსახიობები და მომუშავე პერსონალი გააერთიანა. მართალია, თითქმის ორსაათიანმა გადაცემამ ბევრი გულის ამაჩუყებელი მომენტი მოიცვა, თუმცა, რამდენიმე ადამიანის დანაკლისი მაინც იგრძნობოდა; იმ ადამიანების, რომელთა გარეშეც პოტერიადა ვერ წარმოგვიდგენია.

1. მაიკლ გემბონი (ალბუს დამბლდორი)

გადაცემაში არ გამოჩენილა მაიკლ გემბონი, რომელიც სერიაში მესამედან მერვე ფილმამდე ალბუს დამბლდორის როლს ასრულებდა. ჰოგვორტსის დირექტორის როლზე გემბონი მას შემდეგ დაამტკიცეს, რაც პირველსა და მეორე ფილმებში პერსონაჟის შემსრულებელი რიჩარდ ჰარისი გარდაიცვალა.

2. მეგი სმითი (მინერვა მაკგონაგელი)

საიუბილეო ეპიზოდში არ გამოჩენილა არც მეგი სმითი, რომელიც ყველა ფილმში გრიფინდორის კლუბის ხელმძღვანელისა და ტრანსფიგურაციის მასწავლებლის, პროფესორი მინერვა მაკგონაგელის როლს ასრულებდა.

3. ჯული უოლტერსი (მოლი უისლი)

გადაცემაში ბევრჯერ ახსენეს ჯული უოლტერსი, რომელმაც უისლების დედის როლი შეასრულა, თუმცა თავად მსახიობი ეპიზოდში არ გამოჩენილა. ამის მიზეზი უცნობია, მაგრამ 2020 წელს უოლტერსმა განაცხადა, რომ მსახიობის კარიერას ასრულებდა. მიუხედავად ამისა, საიუბილეო გადაცემაში ვიხილეთ მარკ უილიამსი, რომელმაც ართურ უისლის როლი ითამაშა.

4. დევიდ თიულისი (რემუს ლუპინი)

ორსაათიან გადაცემაში დიდი დრო დაეთმო გარი ოლდმანის (სირიუს ბლექისა) და დენიელ რედკლიფის (ჰარი პოტერის) საუბარს, რომლებმაც მნიშვნელოვანი მომენტები, მათ შორის გარდაცვლილ ალან რიკმანთან (სევერუს სნეიპთან) დაკავშირებული, გაიხსენეს. თუმცა, საინტერესო იქნებოდა, პოტერჰედების ერთ-ერთი საყვარელი პროფესორის, რემუს ლუპინის, შემსრულებელი დევიდ თიულისიც რომ გვეხილა.

5. ფიონა შოუ (პეტუნია დერსლი)

გადაცემაში ვერც ჰარი მელინგი (დადლი დერსლი) და ვერც ფიონა შოუ ვერ ვნახეთ. იმის გათვალისწინებით, რომ ვერნონ დერსლის შემსრულებელი რიჩარდ გრიფითსი 2013 წელს გარდაიცვალა, საიუბილეო ეპიზოდში დერსლების ოჯახიდან არავინ გამოჩენილა.

6. ემა თომპსონი (სიბილ ტრელოუნი)

ვინ-ვინ და ემა თომპსონიც თუ დაგვაღალატებდა, არ გვეგონა. მართალია, ლეგენდარულმა მსახიობმა ფილმების სერიაში მოკრძალებული როლი ითამაშა, თუმცა, სიბილ ტრელოუნის პერსონაჟი პოტერიადის სიუჟეტში მეტად მნიშვნელოვანია. მაგრამ რა ვიცით, ეგებ რამე ავის მომასწავებელი ნიშანი დაინახა ჩაის ფინჯანში და ამიტომ არ გამოჩნდა გადაცემაში...

7. რობერტ პეტინსონი (სედრიკ დიგორი)

შეიძლება თავად ეს დიდად არ მოსწონს, თუმცა, რობერტ პეტინსონი უფრო ბინდის ვარსკვლავია, ვიდრე ჰარი პოტერის. პეტინსონს პოტერიადის მიმართ თავის სიყვარულზე არაერთხელ უსაუბრია, თუმცა, საიუბილეო გადაცემაში გამოჩენით თავი მაინც არ შეიწუხა.

8. ბრენდან გლისონი (ალასტორ მუდი)

სპეციალურ ეპიზოდში ვერც ცეცხლოვან თასში გაცნობილი კიდევ ერთი პერსონაჟის, ალასტორ მუდის, შემსრულებელს მოვკარით თვალი. არ გამოჩენილა არც გლისონის შვილი, დონალი, რომელმაც ბოლო ორ ფილმში ბილ უისლის როლი ითამაშა.

9. დევიდ ბრედლი (არგუს ფილჩი)

ყველა პოტერჰედისთვის "საყვარელი" არგუს ფილჩის 80 წელს მიტანებული შემსრულებელი, დევიდ ბრედლი, გადაცემაში არ აღმოჩნდა. სხვათა შორის, არც მისის ნორისისთვის მოგვიკრავს თვალი...

10. დევონ მიურეი (სიმუს ფინიგანი)

თუ გაინტერესებთ, როგორ ჩაიარა საიუბილეო გადაცემამ, თანაც ახალ წელს, აფეთქებების გარეშე, პასუხი ცალსახაა — ეპიზოდში არ გამოჩენილა სიმუს ფინიგანის შემსრულებელი მსახიობი, დევონ მიურეი. თუმცა, მისი განუყრელი მეგობარი, დინ თომასი (მსახიობი ალფრედ ენოქი) ჰოგვორტსის დიდ დარბაზში ისევ ვიხილეთ.

გარდა ამ ათეულისა, საიუბილეო გადაცემაში კიდევ ბევრი პერსონაჟის შემსრულებელი მსახიობი მოგვაკლდა თვალში, მათ შორის ქეითი ლიანი (ჩო ჩენგი), ტიმოთი სპოლი (პიტერ პეტიგრიუ), უორვიკ დევისი (პროფესორი ფლიტვიკი და გრიპჰუკი), ჯიმ ბროუდბენტი (ჰორაციუს სლაგჰორნი) და კენეთ ბრანა (გილდეროი ლოკჰარტი). სპეციალურ ეპიზოდში არ მიუწვევიათ, თუმცა არქივიდან ამოღებული მასალით რამდენიმე წამით აჩვენეს პოტერიადის შემქმნელი ჯოან როულინგი.