სახელმწიფო უსაფრთხოების სამსახურის ხელმძღვანელის, გრიგოლ ლილუაშვილის განცხადებით, ე.წ. კრებსები, რომლებშიც სავარაუდო ფარული მოსმენების შესახებ წერია ფაილები არ არის და ვორდის დოკუმენტებია. მისი თქმით, ავთენტურობის შესწავლა მიმდინარეობს და ნაწილი ადასტურებს ნამდვილობას, ნაწილი კი არა.

რუსთავი 2-ის წამყვანის კითხვაზე, ადასტურებს თუ არა ფაილების ავთენტურობას და გვისმენს თუ არა სუს, ლილუაშვილი ამბობს, რომ უწყება მიყურადებას კანონიერ საფუძველზე აწარმოებს.

"სუს აწარმოებს ფარულ მიყურადებას კანონიერ საფუძველზე. გინახავთ სადმე სამსახური, სპეცსამსახური, რომელიც არ აწარმოებს ან სამართალდამცავი უწყება, რომლის ხელშიც არის გამოძიება, რომლის ხელში არის ოპერატიული სამსახური და არ აწარმოებდეს ფარულ მიყურადებას?! თუმცა ეს უნდა ხდებოდეს, რა თქმა უნდა, კანონიერ საფუძველზე და რა თქმა უნდა იმ წესების დაცვით, რასაც კანონმდებლობა აწესებს.

თქვენ აღნიშნეთ ფაილები, რომლებიც ფაილები არ იყო. ჩვენი ინფორმაციით, ეს არის ვორდის დოკუმენტები, ჩვეულებრივი აკრეფილი ვორდის დოკუმენტი, რომელიც შეიცავს გარკვეულ შინაარსს.

დადასტურებას რაც შეეხება , რა თქმა უნდა, გამოძიების მსვლელობისას, გამოძიებას აწარმოებს გენერალური პროკურატურა ხდება ამ ტექსტების ავთენტურობის შესწავლა. რაღაც პროცენტი ადასტურებს არსებული დიალოგის, ან იქ განთავსებული ინფორმაციის ნამდვილობას. ხოლო, ჩემი ინფორმაციით, დიდი ნაწილი ამას არ ადასტურებს", — განაცხადა მან.

ლილუაშვილი ფაილების გავრცელებას დაგეგმილ პროვოაციას უწოდებს და ფიქრობს, რომ ტელევიზიებმა უწყებაზე "შტურმი მოაწყვეს".

"მე არ მინდა წინ გავუსწრო გამოძიებას და ჩემი ვერსიები შევთავაზო, თუმცა ეს იყო დაგეგმილი პროვოკაცია, რომლის მიზანი ყველამ ვიხილეთ ცოტა ხანში. აჟიტირებული მედიასაშუალებები, გადაინაწილეს მიმართულებების მიხედვით მათ იქ არსებული შინაარსობრივი მიმართულებები და ამ ტელევიზიებმა პირდაპირი შტურმი მოაწყვეს ჩვენი სამსახურის მისამართით.

მიზანი იყო დაპირისპირების ჩამოგდება ჩვენს სამსახურს, სახელმწიფოსა და ეკლესიას შორის; ჩვენს სამსახურსა და დიპლომატებს შორის, თუმცა, საბედნიეროდ, მათ ეს არ გამოუვიდათ, მიზანს ვერ მიაღწიეს", — განაცხადა ლილუაშვილმა.

წამყვანმა სუს-ის ხელმძღვანელს ჰკითხა, შეხვდნენ თუ არა დიპლომატებს ამ სკანდალის შემდეგ და ჰქონდათ თუ არა მათთან მოსმენებზე საუბარი, ლილუაშვილმა თქვა, რომ დიპლომატებს პერიოდულად ხვდებიან.

"ჩვენ პერიოდულად ვხდებით დიპლომატებს, მათ შორის, ევროკავშირის წარმომადგენლობას, ვიხილავთ უსაფრთხოების კონტექსტის საკითხებს, ასევე რეგიონში მიმდინარე საკითხებს. მე ვფიქრობ, რომ ჩვენ გასარკვევი ერთმანეთთან არაფერი გვაქვს, ჩვენ სრულ თანხვედრაში ვართ ჩვენ მოსაზრებებში, ჩვენ მიერ განხორციელებულ ქმედებებში. უფრო მეტიც, ყველა პარტნიორი ქვეყანა და მისი წარმომადგენელი, ანუ დიპლომატიური წარმომადგენლობა მიგვიჩნევს, როგორც საიმედო და მყარ პარტნიორს უსაფრთხოების საკითხებში.

პასუხებს ყველა კითხვაზე გასცემს გამოძიება. მე ყველა პასუხს ვერ შევთავაზებ, მიუხედავად იმისა, შეიძლება ვიცოდე წინსწრებად ესა თუ ის საკითხი რას უკავშირდება, თუმცა მე ამის უფლება არა მაქვს რომ სუბიექტური მოსაზრებები შევთავაზო", — განაცხადა მან.