უკრაინის საგარეო საქმეთა სამინისტრო საქართველოს ხელისუფლებას მოუწოდებს, რომ მიხეილ სააკაშვილს პატივისცემით მოექცნენ. ამის შესახებ უწყებამ სპეციალური განცხადება გაავრცელა, სადაც აღნიშნულია, რომ ექსპრეზიდენტის რუსთავის ციხეში გადაყვანის მცდელობა არასათანადო იყო.

"მოვუწოდებთ საქართველოს ხელისუფლებას, უკრაინის მოქალაქეს პატივისცემით მოექცნენ და არ დაუშვან ქმედებები, რომლებიც მის სიცოცხლესა და ჯანმრთელობას საფრთხეს უქმნის", — აღნიშნულია განცხადებაში.

ამასთან, როგორც საგარეო წერს, უკრაინელი დიპლომატები სიტუაციის კონტროლსა და მუდმივ დიალოგს, როგორც საქართველოს ხელისუფლებასთან, ასევე, სააკაშვილის ადვოკატებთან აგრძელებენ. მათი თქმით, ქართულმა მხარემ ექსპრეზიდენტის გამოკვლევის მიზნით, მასთან უკრაინელი ექიმები უნდა დაუშვას. განცხადებაში აღნიშნულია ისიც, რომ ისინი სააკაშვილის უკრაინაში დაბრუნებაზე მუშაობენ.

28 დეკემბერს გორის ჰოსპიტალში სააკაშვილის მკურნალი ექიმმა, ნინო გოგორიშვილმა ექსპრეზიდენტის ადვოკატი, ნიკა გვარამია შეცდომაში შეყვანაში დაადანაშაულა. ნიკა გვარამიამ წაიკითხა ოქმი, სადაც, მისი თქმით, ექიმი, ნინო გოგორიშვილი საუბრობს, თუ რა მოხდა 27 დეკემბერს, როდესაც სააკაშვილს გადაყვანის შესახებ აცნობეს.

ექიმი ამბობს, რომ ოქმის შედგენისას გვარამიამ შეცდომაში შეიყვანა, გვარამია კი კამერების ჩანაწერების ამოღებას ითხოვს.

27 დეკემბერს, მთელი საღამოს განმავლობაში, ვრცელდებოდა ინფორმაცია გორის სამხედრო ჰოსპიტლიდან მიხეილ სააკაშვილის შესაძლო გადაყვანის შესახებ. თუმცა ამის შესახებ ინფორმირებულები არ იყვნენ სააკაშვილის ადვოკატები და ოჯახის წევრები.

მოგვიანებით, სახალხო დამცველის წარმომადგენელი ანა ჯანიაშვილი გორის ჰოსპიტალში მივიდა. მისი განცხადებით, სააკაშვილმა უთხრა, რომ რუსთავის ციხეში მის გადაყვანას აპირებდნენ, რა დროსაც გონება დაკარგა. ჯანიაშვილის თქმით, ამ შემთხვევას სახალხო დამცველი შეისწავლის.

სააკაშვილის გადაყვანაზე ინფორმაცია უწყებამ მხოლოდ მეორე დღეს დაადასტურა. როგორც 28 დეკემბერს პენიტენციურმა სამსახურმა თქვა, რომ გორის სამხედრო ჰოსპიტალმა სააკაშვილი გაწერა, თუმცა გადაყვანა დროებით გადაიდო.