გვინდა თუ არა, პოლიტიკა, პოლიტიკოსები და ქვეყნის მართვის პროცესში ჩართული ადამიანების მნიშვნელოვანი თუ უმნიშვნელო საქმიანობა ჩვენი ყოველდღიურობის განუყოფელი ნაწილია. ამ ადამიანებისა და მოვლენებისთვის თვალის მიდევნება ძალიან რთულია, თუმცა, საბედნიეროდ, დღეს კამერით ყველაფრის აღბეჭდვაა შესაძლებელი. თანაც ხანდახან ისეც ხდება, რომ მნიშვნელოვანთან ერთად ძალიან უმნიშვნელო და ამაო კადრებიც გვრჩება, რომელზეც მხოლოდ სიცილიღა დაგვრჩენია.

განსაკუთრებით სახალისო მუნიციპალიტეტების ფეისბუქგვერდებზე დადებული ფოტოებია, რომელთათვის ყოველდღიურად ყურადღების მიქცევა რთულია. საბედნიეროდ, არსებობს ფეისბუქგვერდი, სახელად მუნიციპალიტეტების ფოტოგრაფების ამაოება / Vanity of Municipal Photographers, რომელიც საქმეს გვიმარტივებს და მუნიციპალიტეტების ფოტოგრაფების მიერ გადაღებულ ამაო ფოტოებს ერთ სივრცეში გვიზიარებს.

მაშ ასე, გთავაზობთ 2021 წლის 13 საუკეთესო ფოტოს მუნიციპალიტეტების ფოტოგრაფებისგან:

1. სოფელ კაბალში ახლადგახსნილი ბაღის დათვალიერება — 12 ოქტომბერი, 2021

ოქტომბერში სოფელ კაბალში ახლადგახსნილი ბაღი ლაგოდეხის მუნიციპალიტეტის საკრებულოს თავმჯდომარე კახა ჯამბურიამ, პარლამენტის წევრმა გურამ მაჭარაშვილმა, მუნიციპალიტეტის მერმა ჯონდო მდივნიშვილმა და სხვებმა საკმაოდ ყურადღებით დაათვალიერეს.

2. სასმელი წყლის რეაბილიტაცია სოფელ ღუნდაში — 20 ოქტომბერი, 2021

წყლის რეაბილიტაციის პროცესი დასრულებული და შემოწმებულია.

3. ახლადაშენებული ხიდი ხულოში — 15 ოქტომბერი, 2021

ხულოს მუნიციპალიტეტის ინფორმაციით, ხიდის სიგრძე 4,6 მეტრს, სიგანე კი 5 მეტრს შეადგენს.

4. პროექტი "საბავშვო არქეოლოგია" — 4 დეკემბერი, 2021

სენაკის მუნიციპალიტეტის საკრებულოს წევრი საბა ოდიშარია პროექტ "საბავშვო არქეოლოგიის" მიმდინარეობას დაესწრო და, როგორც ჩანს, აქტივობებში თავადაც ჩაერთო.

5. სოფელ მეჩხეთურში გზის სამშენებლო სამუშაოების პროცესზე დაკვირვება — 30 ნოემბერი, 2021

ჭიათურის მერმა გივი მოდებაძემ და მერის მოადგილე დავით ბიწაძემ სოფელ მეჩხეთურში გზის სამშენებლო სამუშაოების მიმდინარეობა შეამოწმეს.

6. დისტანციური შეხვედრა დეპუტატ ბეჟან წაქაძესთან — 18 დეკემბერი, 2021

დამსწრე საზოგადოებას შეხვედრაზე დეპუტატისთვის მათთვის საინტერესო კითხვების დასმის შესაძლებლობა მიეცა.

7. "ეს ბზარი იყო აქ?" — წალენჯიხის მუნიციპალიტეტის მერია, 19 დეკემბერი, 2021

წალენჯიხის მუნიციპალიტეტის მერის პირველმა მოადგილემ, ლაშა ზარქუამ ქალაქ წალენჯიხაში მრავალბინიანი საცხოვრებელი კორპუსების ფასადების სარეაბილიტაციო სამუშაოები დაათვალიერა და კედელზე ბზარებიც აღმოაჩინა.

8. სამაცივრე მეურნეობის დათვალიერება — 10 ნოემბერი, 2021

გარემოს დაცვისა და სოფლის მეურნეობის მინისტრის პირველმა მოადგილემ, გიორგი ხანიშვილმა შპს "აგროგრუპის" ახლადგახსნილი სამაცივრე მეურნეობა დაათვალიერა.

9. სარეაბილიტაციო სამუშაოების დათვალიერება საჩხერეში — 3 ნოემბერი, 2021

ნოემბერში საჩხერეში თავისუფლებისა და მუხრან მაჭავარიანის ქუჩების ტროტუარების, ღობეებისა და ჭიშკრების მოწყობის სამუშაოები მიმდინარეობდა.

10. ირაკლი ღარიბაშვილი გურიაში თხილის საწარმოს ეწვია — 19 აგვისტო, 2021

ირაკლი ღარიბაშვილი საწარმოო პროცესს გაეცნო, დასაქმებულებსაც გაესაუბრა და თხილიც დაათვალიერა.

11. ირაკლი ღარიბაშვილი სტუმრად მაჩხაანის ახალაშენებულ საჯარო სკოლაში — 15 აგვისტო, 2021

ირაკლი ღარიბაშვილმა კახა კუჭავასთან, მიხეილ ჩხენკელთან და ლევან დავითაშვილთან ერთად დედოფლისწყაროს მუნიციპალიტეტის სოფელ ზემო მაჩხაანის ახალაშენებულ საჯარო სკოლა დაათვალიერა.

12. ვაკის პარკის დათვალიერება — 28 ოქტომბერი, 2021

თბილისის მერმა კახა კალაძემ და საკრებულოს თავმჯდომარე გიორგი ტყემალაძემ ვაკის პარკის რეაბილიტირებული ნაწილი მოინახულეს.

13. აღდგენილი წყლის მაგისტრალის შემოწმება — 2 ივლისი, 2021

სამტრედიის მუნიციპალიტეტის მერის პირველმა მოადგილემ გრიგოლ დალაქიშვილმა წიაღუბანში აღდგენილი წყლის მაგისტრალი დაათვალიერა.