რადიო თავისუფლების ჟურნალისტური გამოძიების თანახმად, პოლიციელი, რომელმაც თბილისში, სახლის აივნიდან სამსახურებრივი იარაღიდან გასროლით, შემთხვევით მეზობელ კორპუსში მცხოვრები 50 წლის ქალი მოკლა, თავისუფალია. რადიო თავისუფლების ინფორმაციით, პოლიციელს საქალაქო სასამართლომ 8 წელი მიუსაჯა, ხოლო სააპელაციო სასამართლოს გადაწყვეტილებით, მას ბრალი შეუმსუბუქდა და საპატიმრო 1 წელსა და 3 თვეში დატოვა.

მედიისთვის ექსკლუზიურად მიწოდებული ინფორმაციით, პოლიციელი სოსო გაბრიაძე დაკავებიდან 15 თვეში, 2021 წლის ივლისში ციხიდან გაათავისუფლეს.

"ამასვე ადასტურებს სოციალურ ქსელში სექტემბერში მისი და მისი მეუღლის გამოქვეყნებული ფოტოები. სურათებზე ჩანს, რომ ოჯახი საქართველოს ერთ ერთ საზღვაო კურორტზე იმყოფება. თიკა მახალდიანის ოჯახმა გაბრიაძის გათავისუფლების შესახებ დაზუსტებით რადიო თავისუფლებიდან შეიტყო, მახალდიანის მეუღლემ გვითხრა, რომ ამის შესახებ ყურმოკვრით იცოდა, თუმცა დადასტურებული ფაქტი და ციხიდან გამოსვლის დრო არ იცოდნენ", — ვკითხულობთ გამოძიებაში.

ოჯახისთვის ბოლო ოფიციალური ინფორმაცია იყო, რომ გაბრიაძეს საქალაქო სასამართლომ 108-ე მუხლით, განზრახ მკვლელობისთვის 8 წლით პატიმრობა მიუსაჯა, ოჯახში მსჯელობდნენ გაეპროტესტებინათ თუ არა საქალაქო სასამართლოს ეს გადაწყვეტილება და მოეთხოვათ თუ არა მკვლელისთვის მეტი წლით პატიმრობა.

2020 წლის აღდგომის დღეს, თბილისში, ვაჟა-ფშაველას გამზირზე, სახლის აივნიდან ნასვამმა პოლიციელმა სამსახურებრივი იარაღიდან გასროლით, შემთხვევით მეზობელ კორპუსში მცხოვრები 50 წლის ქალი მოკლა. ქალის გაუფრთხილებლობით მკვლელობის ბრალდებით პოლიციელი იმავე წლის 20 აპრილს დააკავეს.