სპაიდერმენის ტრილოგიის დასკვნითი ფილმი წლის ერთ-ერთი უმნიშვნელოვანესი კინომოვლენაა, რასაც მაყურებელთა დადებითი შეფასებების გარდა, ფილმის შემოსავალიც ადასტურებს. Spider-Man: No Way Home-მა $1 მილიარდზე მეტი გამოიმუშავა და წლის ყველაზე მაღალშემოსავლიანი ფილმიც გახდა.

აღსანიშნავია, რომ Spider-Man: No Way Home პანდემიურ პერიოდში ერთადერთი ფილმია, რომელმაც ამ ნიშნულს გადააჭარბა. ბოლო ფილმი, რომლის შემოსავალიც $1 მილიარდს აღემატებოდა 2019 წელს გამოსული Star Wars: The Rise of Skywalker იყო.

სავარაუდოდ, ეს რიცხვი კიდევ უფრო გაიზრდება, რადგან ფილმი ჯერჯერობით ჩინეთში არ გამოსულა. სპაიდერმენის ახალმა ფილმმა $1-მილიარდიან მაჩვენებელს გამოსვლიდან სულ რაღაც 12 დღეში მიაღწია. ამ წარმატებით ის მხოლოდ Avengers: Infinity War-სა და Avengers: Endgame-ს ჩამორჩება.

სპაიდერმენის ახალი ფილმი პიტერ პარკერის თავგადასავალზე გვიამბობს მას შემდეგ, რაც სამყაროს მისი ვინაობა მისტერიომ გაუმხილა. ფილმში ტომ ჰოლანდი, ზენდეია, ბენედიქტ კამბერბეჩი, ჯეიკობ ბატალონი, მარისა ტომეი, უილიამ დეფო, ალფრედ მოლინა და სხვები მონაწილეობენ.

მართალია, No Way Home სპაიდერმენის ტრილოგიის დასკვნითი ნაწილია, თუმცა Sony-ს პროდიუსერმა უკვე დაადასტურა, რომ ტომ ჰოლანდის მონაწილეობით სპაიდერმენის შესახებ კიდევ, სულ მცირე, 3 ფილმი გამოვა.

ამავე თემაზე: