ნაციონალური მოძრაობის თავმჯდომარე, ნიკა მელია პრეზიდენტ სალომე ზურაბიშვილს ორშაბათს, 27 დეკემბერს შეხვდება. ინფორმაცია On.ge-ს პარტიის პრესსამსახურში დაუდასტურეს. ენმ-ის წევრის, ზაალ უდუმაშვილის განცხადებით, ისინი ექსპრეზიდენტ მიხეილ სააკაშვილის გარდა, ბევრ სხვა საკითხზეც ისაუბრებენ.

"მიხეილ სააკაშვილის საკითხი არის მთავარი, მთავარი არის ამ აქციის მოთხოვნებშიც, რომელიც მიმდინარეობს ჩვენი ოფისის მიმდებარე ტერიტორიაზე. თუმცა ბევრ სხვა საკითხზეც სავარაუდოდ, ისაუბრებენ ნიკა მელია და სალომე ზურაბიშვილი, მათ შორის, იმ პოლიტიკურ კრიზისზე, რომელიც დღეს ქვეყანაშია და როგორ ხედავენ გამოსავალს, რომ როგორმე დაიძლიოს ეს პოლიტიკური კრიზისი", — თქვა მან TV პირველის ეთერში.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

საახალწლო მიღების შემდეგ პრეზიდენტი ეროვნულ თანხმობაზე სასაუბროდ ინდივიდუალურ შეხვედრებს მართავს პოლიტიკოსებთან, რელიგიური კონფესიების წარმომადგენლებთან, არასამთავრობო ორგანიზაციის წარმომადგენლებთან, სახალხო დამცველთან და სახელმწიფო ინსპექტორთან.

გაიგე მეტი: