რუსეთის პრეზიდენტი ვლადიმირ პუტინი კვლავ აცხადებს, რომ NATO-ს აღმოსავლეთით გაფართოება კრემლისთვის მიუღებელია. პუტინის თქმით, შეერთებული შტატები მათი სახლის ზღურბლს მოადგა.

"ნათლად და მკაფიოდ გვაქვს ნათქვამი, რომ NATO-ს გაფართოება აღმოსავლეთით მიუღებელია. რა არის აქ გაუგებარი? ჩვენ რა ვდგამთ რაკეტებს შეერთებული შტატების საზღვრებთან? არა. შეერთებული შტატები მოადგა ჩვენს სახლებს რაკეტებით, ჩვენი სახლების ზღურბლზე იმყოფებიან უკვე. ზემდეტი მოთხოვნაა ეს? ერთი დიუმიც არ გადმოხვიდეთ აღმოსავლეთით, გვითხრეს 90-იან წლებში, და რა? დაგვაბოლეს", — თქვა პუტინმა.

კრემლის წარმომადგენლებს არაერთხელ განუცხადებიათ, რომ, მაგალითად, საქართველოსა და უკრაინაში NATO-ს ინფრასტრუქტურის განთავსებას არ დაუშვებენ.

ამასთან, რუსეთის საგარეო საქმეთა სამინისტრო მოითხოვს, გაუქმდეს 2008 წლის ბუქარესტის სამიტის გადაწყვეტილება, რომლის მიხედვითაც საქართველო და უკრაინა NATO-ში უნდა გაწევრიანდნენ. სერგეი ლავროვის უწყებამ "რუსეთის უსაფრთხოების დაცვის" მოტივით მოთხოვნებით სავსე განცხადება გამოაქვეყნა, რომელშიც დასავლეთი, ყველაზე მეტად კი აშშ და NATO-ს წევრი ქვეყნების არის გაკრიტიკებული.

რუსეთის საგარეო უწყების განცხადებას საქართველოს საგარეო საქმეთა სამინისტრო მიუღებლად მიიჩნევს. საგარეო უწყების განცხადებით, NATO-ში გაწევრიანება საქართველოს სუვერენულ გადაწყვეტილებას წარმოადგენს, რომელიც დაფუძნებულია საქართველოს მოსახლეობის უმრავლესობის ურყევ ნებაზე. აღნიშნული მიზანი ასახულია საქართველოს კონსტიტუციაშიც.

NATO-ს გენერალური მდივნის იენს სტოლტენბერგის განცხადებით, ალიანსის პოზიცია უცვლელი რჩება და ყველა ერს აქვს უფლება საკუთარი გზა აირჩიოს.