კანის საერთაშორისო კინოფესტივალი წელს 70 წლის ხდება, პარფიუმერული კომპანია L’Oréal კი ფესტივალთან პარტნიორობის მეოცე წლისთავს აღნიშნავს.

სწორედ ამიტომ, კომპანიამ გადაწყვიტა, მაისში ფესტივალის პერიოდს სპეციალურად საიუბილეოდ შექმნილი ტუჩსაცხის გამოშვება დაამთხვიოს, რომელსაც Color Riche Red Carpet-ს დაარქმევენ, შეფუთვაზე კი კანის ფესტივალის მთავარი პრიზი ოქროს პალმის რტო იქნება გამოსახული.

შეგახსენებთ, რომ წელს კანის კინოფესტივალის საიუბილეო პოსტერზე ლეგენდარული მსახიობი კლაუდია კარდინალეა გამოსახული.

მოცეკვავე კლაუდია მომღიმარი სახით კანში ჩასულ სტუმრებს ყველაზე პრესტიჟული ფესტივალის დაწყების შესახებ ამცნობს.

"მიხარია და ამაყი ვარ, რომ კანის კინოფესტივალის სამოცდამეათე წლისთავის აღსანიშნავ პოსტერზე მე ვიქნები. ეს ფოტო ჯერ კიდევ იმ პერიოდშია გადაღებული, როცა რომში ვიყავი და ვერც კი წარმოვიდგენდი, რომ ჩემი კარიერა ასე წარიმართებოდა. მით უმეტეს იმას, რომ წლების შემდეგ ჩემი სახე ყველაზე დიდებული ფესტივალის სავიზიტო ბარათი იქნებოდა.", - ამბობს კარდინალე.

თუმცა ასე არ ფიქრობენ ფემინისტები, რადგან როგორც აღმოჩნდა, იმისთვის, რომ კლაუდია უფრო გამხდარი გამოჩენილიყო, ვიდრე რეალურად იყო, მას სხეულის ფორმები შეუცვალეს.

"კლაუდია კარდინალე ერთ ბრუნში დაპატარავდა“, - წერს ფრანგული გამოცემა Libération.

"თუკი კლაუდია კარდინალე სილამაზის სტანდარტებს ვერ აკმაყოფილებს, ჩვენ ნამდვილად პრობლემა გვაქვს", - წერს გაზეთ Le Monde-ს ჟურნალისტი.

აჟიოტაჟს გამოეხმაურა თავად მსახიობიც და ამბობს, რომ პოსტერის გამო მისი ფორმების შეცვლაში დრამატულს ვერაფერს ხედავს.

"ფოტო იმიტომ შეცვალეს, რომ ის უფრო ჰაეროვანი გამხდარიყო და მე საოცნებო გმირად ვექციე. ასეთი შეშფოთებების მიზეზს ნამდვილად ვერ ვხვდები და როგორც ფემინისტი, ამ ქმედებას ქალის სხეულისადმი მიყენებულ შეურაცხყოფად ნამდვილად არ აღვიქვამ. მგონი ბევრად უფრო მნიშვნელოვანი თემები არსებობს იმისთვის, რომ განვიხილოთ. ეს უბრალოდ კინემატოგრაფიაა", - ამბობს კარდინალე.

კანის ფესტივალის ჟიურის თავმჯდომარე წელს ესპანელი რეჟისორი პედრო ალმოდოვარი იქნება, რომელსაც რამდენჯერმე აქვს მიღებული ოქროს პალმის რტო, მათ შორის ჯილდო საუკეთესო რეჟისურისა და სცენარისთვის.

"ძალიან ბედნიერი ვარ კანის 70-ე, საიუბილეო ფესტივალზე ასეთი საპატიო სტატუსით რომ ჩავალ. იმედი მაქვს ჩემზე დაკისრებულ მოვალეობას კარგად შევასრულებ. პირობას ვდებ, რომ საკუთარ თავს, სხეულსა და სულს შევწირავ ამ საქმეს, რადგან იყო კანის ფესტივალის ჟიურის თავმჯდომარე არის დიდი პრივილეგია და პატივი", - ამბობს პედრო ალმოდოვარი.