კანის კინოფესტივალი წელს სამოცდაათი წლის ხდება. ამ ღირსშესანიშნავი თარიღის აღსანიშნად, ფესტივალის საიუბილეო პოსტერზე ლეგენდარული მსახიობი კლაუდია კარდინალე გამოსახეს.

მოცეკვავე კლაუდია მომღიმარი სახით კანში ჩასულ სტუმრებს ყველაზე პრესტიჟული ფესტივალის დაწყების შესახებ ამცნობს.

ფოტო: Cannes

"მიხარია და ამაყი ვარ, რომ კანის კინოფესტივალის სამოცდამეათე წლისთავის აღსანიშნავ პოსტერზე მე ვიქნები. ეს ფოტო ჯერ კიდევ იმ პერიოდშია გადაღებული, როცა რომში ვიყავი და ვერც კი წარმოვიდგენდი, რომ ჩემი კარიერა ასე წარიმართებოდა. მით უმეტეს იმას, რომ წლების შემდეგ ჩემი სახე ყველაზე დიდებული ფესტივალის სავიზიტო ბარათი იქნებოდა.", - ამბობს კარდინალე.

იტალიელი მსახიობი შესაძლოა წელს კანის ფესტივალსაც დაესწროს, სადაც როგორც ამბობენ მისი მონაწილეობით გადაღებული ფილმის Piccolina bella პრემიერა გაიმართება.

კანის ფესტივალის ჟიურის თავმჯდომარე წელს ესპანელი რეჟისორი პედრო ალმოდოვარი იქნება, რომელსაც რამდენჯერმე აქვს მიღებული ოქროს პალმის რტო, მათ შორის ჯილდო საუკეთესო რეჟისურისა და სცენარისთვის.

"ძალიან ბედნიერი ვარ კანის 70-ე, საიუბილეო ფესტივალზე ასეთი საპატიო სტატუსით რომ ჩავალ. იმედი მაქვს ჩემზე დაკისრებულ მოვალეობას კარგად შევასრულებ. პირობას ვდებ, რომ საკუთარ თავს, სხეულსა და სულს შევწირავ ამ საქმეს, რადგან იყო კანის ფესტივალის ჟიურის თავმჯდომარე არის დიდი პრივილეგია და პატივი", - ამბობს პედრო ალმოდოვარი.

კანის კინოფესტივალი 17 მაისს დაიწყება.