ექსპრეზიდენტი მიხეილ სააკაშვილი აცხადებს, რომ მისი გათავისუფლების მოთხოვნით მასობრივ შიმშილობაში ჩართულები ქართველი გმირების ტრადიციებს აგრძელებენ. ის თავის მხარდამჭერებს ცოტნე დადიანს ადარებს.

"რაც გავიგე, ასეულობით ახალი ადამიანი უერთდება მასობრივ შიმშილობას მთელ საქართველოში. თითოეული ეს ადამიანი არის ცოტნე დადიანის და სხვა ქართველი გმირების ტრადიციების გამგრძელებელი. ქვეყანას, რომელსაც ასეთი ხალხი ჰყავს, დამარცხება და გაქრობა არ უწერია", — წერს ის.

21 დეკემბერს პარლამენტთან მიმდინარე აქციაზე მელიამ ექსპრეზიდენტ მიხეილ სააკაშვილის გათავისუფლების მოთხოვნით უვადო, მასობრივი შიმშილობა დააანონსა. მელია ამბობს, რომ ამ გადაწყვეტილებას დაახლოებით 2 კვირის განმავლობაში განიხილავდა და ექსპრეზიდენტმა სააკაშვილმა არ იცოდა. მისივე თქმით, შიმშილობაში რამდენიმე ასეული ადამიანი მიიღებს მონაწილეობას და არსებული ინფორმაციით, 300-ზე მეტი მსურველია.

მისივე თქმით, მასობრივი საპროტესტო შიმშილობა დაიწყება კახეთის გზატკეცილზე, ერთიანი ნაციონალური მოძრაობის ოფისის მიმდებარე ტერიტორიაზე.