ნაციონალური მოძრაობის თავმჯდომარის, ნიკა მელიას განცხადებით, პატივს სცემს პრეზიდენტ სალომე ზურაბიშვილის ინიციატივას ეროვნული თანხმობის შესახებ. როგორც მან აღნიშნა, აქტიურად ჩაერთვება ამ პროცესში, რათა არ განმეორდეს ის შეცდომები, რომელიც "30 წლის წინ დაიწყო" რუსთაველის გამზირზე.

"ძალიან დიდი პატივს ვცემ და მივესალმები მე პირადად, მეგობრებთან ერთად, იმ პროცესს, რომელიც ქალბატონმა ზურაბიშვილმა წამოიწყო, ეროვნული თანხმობის პროცესი და ჩვენის მხრივ ყველაფერს გავაკეთებთ, რომ თუკი იოტის ოდენა შანსი არსებობს თანხმობისა, ამ პროცესში პოზიტიური როლი ვითამაშოთ და წვლილი შევიტანოთ, იმიტომ, რომ ძმათა მკვლელი ომი და დაპირისპირება არავის აწყობს, გარდა რეჟიმისა", — განაცხადა მან აქციაზე.

გარდა ამისა, მან აღნიშნა, რომ დღეიდან მიხეილ სააკაშვილის გათავისუფლებისთვის მასობრივ საპროტესტო შიმშილობის აქციას იწყებენ. მისი თქმით, არ სურთ ზურაბიშვილს ხელი შეუშალონ დაწყებულ პროცესში და არც ის, ბავშვებს საახალწლო განწყობა გაუფუჭონ, ამიტომ შიმშილობას დაიწყებენ კახეთის გზატკეცილზე, ენმ-ს ოფისთან.

"მე მეგობრებთან ერთად, ძალიან ბევრ ადამიანთან ერთად და დარწმუნებული ვარ, ჩვენ ვიქნებით იმაზე მეტი, ვიდრე მავანს წარმოუდგენია, მიხეილ სააკაშვილის ტყვეობიდან გათავისუფლებისთვის ვიწყებთ ახალ საეტაპო ბრძოლას და დღეიდან ჩვენ ვაცხადებთ მასობრივ საპროტესტო შიმშილობის აქციას", — განაცხადა მელიამ.

16 დეკემბერს, პრეზიდენტმა, სალომე ზურაბიშვილმა სპეციალურ საახალწლო მიღებაზე, რომელზეც როგორც ხელისუფლება, ისე საპარლამენტო და არასაპარლამენტო ოპოზიციის წარმომადგენლები მიიწვია, ქვეყანაში არსებულ პოლარიზაციაზე ისაუბრა და მისი გადაჭრის გზად სწორედ ერთიანი ძალისხმევა დაასახელა. ზურაბიშვილის განცხადებით, შერიგება ვერ იქნება წინაპირობა, რადგან ის არის შედეგი. მისივე თქმით, პროცესი უნდა დაიწყოს მოსმენით, აზრების გაცვლით, გაგრძელდეს სიმართლის გაგებითა და შემდეგ შეიძლება, საბოლოო მიზანს მიაღწიო.

მანამდე, 10 დეკემბერს, აშშ-ში, დემოკრატიის სამიტზე სიტყვით გამოსვლისას სალომე ზურაბიშვილმა განაცხადა, რომ დაიწყებს ინკლუზიურ პროცესს და ეროვნული მასშტაბის საუბარს, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ.

მოქმედ პრეზიდენტის გამოეხმაურა ყოფილი პრეზიდენტი, მიხეილ სააკაშვილი და მას ასევე ყოფილი პრეზიდენტის, გიორგი მარგველაშვილის იდეის შესრულება შესთავაზა. საუბარია სამივე პრეზიდენტის შეხვედრაზე. სააკაშვილმა ზურაბიშვილი და მარგველაშვილი გორის სამხედრო ჰოსპიტალში შესახვედრად მიიწვია.

იდეას გამოეხმაურა მარგველაშვილიც, რომელმაც განაცხადა, რომ სამი პრეზიდენტის შეხვედრა სწორად დანახული დინამიკაა.

France 24-თან ინტერვიუში კი ზურაბიშვილმა განაცხადა, რომ აიღო ვალდებულება, შერიგების პროცესის დაწყების.