ჰარი პოტერის ფილმების სერიის პირველი ფილმის გამოსვლიდან 20 წელი გავიდა და მალე ამ საიუბილეო თარიღის აღსანიშნავად სპეციალურ გადაცემასაც ვიხილავთ, მაგრამ ნოსტალგიური მოგონებების გახსენებასთან ერთად შესაძლებლობა გვაქვს, რომ ეს ჯადოსნური სამყარო კიდევ უფრო უკეთ გავიცნოთ.

ამაში Fantastic Beasts-ის (ჯადოსნური ცხოველები) ფილმების სერია გვეხმარება, რომელიც შედარებით უფრო შორეულ წარსულში განვითარებულ მოვლენებზე გვიამბობს. პირველი ორი ფილმი საკმაოდ წარმატებული გამოდგა, მალე კი მესამე ნაწილსაც ვიხილავთ, რომლის სულ ცოტა ხნის წინ გავრცელებული ტრეილერით თუ ვიმსჯელებთ, წინ ნამდვილად დაუვიწყარი სანახაობა გველოდება:

შთამბეჭდავ, დაძაბულ და მასშტაბურ კადრებთან ერთად ეს ტრეილერი განსაკუთრებულ ყურადღებას იქცევს იმითაც, რომ მასში პირველად ვხედავთ მადს მიკელსენს, რომელმაც ფილმის მთავარი ბოროტმოქმედის, გრინდელვალდის როლი ჯონი დეპისგან გადაიბარა.

შეგახსენებთ, ჯერ კიდევ შარშან გახდა ცნობილი, რომ ჯონი დეპი როლზე მადს მიკელსენმა ჩაანაცვლა.

ჯადოსნური ცხოველების სერიის მესამე ნაწილის სახელწოდებაა დამბლდორის საიდუმლოებანი. თუ რა იგულისხმება ამ დამაინტრიგებელ მინიშნებას, ამას ზუსტად 2022 წლის აპრილში გავიგებთ, როცა ფილმის პრემიერა შედგება.